ხვალ, 12 აპრილს, ქართველი მუსიკოსის, ზურაბ ანჯაფარიძის დაბადებიდან 84 და გარდაცვალებიდან 15 წელი სრულდება. მომღერალი (დრამატული ტენორი), სსრკ სახალხო არტისტი, ზ. ფალიაშვილის პრემიის ლაურეატი ზურაბ ანჯაფარიძე 1928 წლის 12 აპრილს ქუთაისში დაიბადა და 1997 წლის 12 აპრილს თბილისში გარდაიცვალა.
1952 წელს დაამთავრა ვ. სარაჯიშვილის სახელობის თბილისის სახელმწიფო კონსერვატორია (პროფ. დ. ანდღულაძის კლასი). 1952-1959 წლებში ზ. ფალიაშვილის სახელობის ოპერისა და ბალეტის თეატრის, 1959-1970 წლებში - სსრკ დიდი თეატრის სოლისტი იყო. 1970-იდან თბილისის ოპერისა და ბალეტის თეატრს დაუბრუნდა.
მის მიერ შესრულებული პარტიებია: აბესალომი, მალხაზი, რატი (ფალიაშვილის "აბესალომ და ეთერი", "დაისი", "ლატავრა"), მინდია (ო. თაქთაქიშვილის "მინდია"), ბაში-აჩუკი (კერესელიძის "ბაში-აჩუკი"), პუშკინი და ერისთავი (თორაძის "ჩრდილოეთის პატარძალი"), არსენა (ბუკიას "არსენა"), გერმანი, ვოდემონი (ცაიკოვსკის "პიკი ქალი", "იოლანტა"), ოტრეპიევი (მუსორგსკის "ბორის გოდუნოვი"), ხოზე (ბიზეს "კარმენი"), რადამესი, დონ-კარლოსი, ჰერცოგი (ვერდის "აიდა", "დონ-კარლოსი", "რიგოლეტო"), კავარადოსი (პუჩინის "ტოსკა"), ფაუსტი (გუნოს "ფაუსტი") და სხვა. ანჯაფარიძეს უმღერია სსრკავშირის მრავალი საოპერო თეატრის სცენაზე და საზღვარგარეთის ქვეყნებშიც (რუმინეთი, ჩეხოსლოვაკია, ბულგარეთი, კანადა, საბერძნეთი, საფრანგეთი, იტალია და სხვა). გაახმოვანა გერმანისა და ვოდემონის პარტიები კინოფილმებში "პიკის ქალი" და "იოლანტა".
