საქართველოს ეროვნულ ბანკში გატარებული რეფორმებისა და ინოვაციური სისტემების გაცნობის მიზნით, 10-11 აპრილს, ეროვნულ ბანკს ავღანეთის ცენტრალური ბანკის წარმომადგენლები ესტუმრნენ. ზალმეი შერზადი - ავღანეთის ცენტრალური ბანკის ფინანსური სექტორის განვითარების პროექტის გენერალური დირექტორი და აზიზ ბარაქი - ანგარიშსწორების სისტემების დეპარტამენტის დირექტორი, საქართველოს ეროვნულ ბანკს მსოფლიო ბანკის რეკომენდაციით ეწვივნენ. სტუმრები ქართველი კოლეგებისგან მიიღებენ ინფორმაციას საგადახდო და ფასიანი ქაღალდების სისტემის დანერგვის შესახებ.
ეს უკვე მესამე უცხოური ცენტრალური ბანკია, რომელიც როგორც წარმატებულ მაგალითს, მსოფლიო ბანკის რეკომენდაციით ეწვია საქართველოს ეროვნულ ბანკს. მანამდე საქართველოს ეროვნულმა ბანკმა პაპუა ახალი გვინეის და ეთიოპიის ცენტრალურ ბანკებს უმასპინძლა. მათი ვიზიტიც ასევე მსოფლიო ბანკის რეკომენდაციით განხორციელდა.
საქართველო ერთ-ერთი პირველი ქვეყანაა, სადაც ამერიკული კომპანია „მონტრანის" მიერ შემუშავებული ახალი თაობის საგადახდო და ფასიანი ქაღალდების ჰიბრიდული სისტემა წარმატებით დაინერგა. ავღანეთის ცენტრალური ბანკის წარმომადგენლებიც ამჯერად ქართველი კოლეგების რეკომენდაციებს და რჩევებს გაიზიარებენ. სტუმრები უკვე შეხვდნენ ეროვნული ბანკის შესაბამისი დეპარტამენტის წარმომადგენლებს და სისტემის სხვადასხვა კომპონენტების დემონსტრირებას დაესწრნენ. აღნიშნული ფაქტი საქართველოს ეროვნულ ბანკს საერთაშორისო საბანკო სამყაროში მეტად წარმოაჩენს და ჩვენს ქვეყანაში გატარებული საბანკო რეფორმების შედეგიანობას კიდევ უფრო ხაზს გაუსვამს.
„საქართველოს ეროვნული ბანკი უკვე იმ ინსტიტუტების სიაშია, რომლებსაც მსოფლიო ბანკი წარმატებულ მაგალითად ასახელებს ინოვაციური და პროგრესული პროექტების განხორციელების თვალსაზრისით. ავღანელი კოლეგები სწორედ მსოფლიო ბანკის რჩევით ეწვივნენ ეროვნულ ბანკს, რათა ადგილზე გაეცნონ იმ რეფორმებსა და სისტემებს, რომელიც ჩვენ ბოლო პერიოდში დავნერგეთ - ეს არის ანგარიშსწორების მაღალტექნოლოგიური სისტემები, რომელიც საშუალებას აძლევს ფინანსურ ინსტიტუტებს გადარიცხვები სწრაფად და უსაფრთხოდ განახორციელონ", - განაცხადა ეროვნული ბანკის აღმასრულებელმა დირექტორმა გიორგი მელაშვილმა.
„ავღანეთის ცენტრალური ბანკის სახელით მინდა მადლობა გადავუხადო საქართველოს ეროვნულ ბანკს იმისათვის, რომ მოგვეცა შანსი გავცნობოდით გადახდის ახალ სისტემას, რომელიც საქართველოს ეროვნულმა ბანკმა დანერგა. ჩვენ, ავღანეთის ცენტრალური ბანკის ორი წარმომადგენელი, მსოფლიო ბანკის დახმარებით და რეკომენდაციით, ვესტუმრეთ საქართველოს ეროვნულ ბანკს და გაცევანით რეალურ დროში ანგარიშსწორების სისტემას (RTGS). მსოფლიო ბანკი ავღანეთში ახორციელებს ორ პროექტს, რომლებიც გააძლიერებს ავღანეთის ცენტრალურ ბანკს და ზოგადად ავღანეთის ფინანსურ სექტორს, საქართველოს ეროვნულმა ბანკმა გაგვიზიარა თავისი გამოცდილება ამ საკითხში, ბოლო ორი დღის განმავლობაში ვესტუმრეთ სხვადასხვა დეპარტამენტებს და დეტალურად გავეცანით ახალ სისტემას", - განაცხადა ავღანეთის ცენტრალური ბანკის ფინანსური სექტორის განვითარების პროექტის გენერალურმა დირექტორმა ზალმეი შერზადიმ.
