"საქსტატსა" და რეგიონალური განვითარებისა და ინფრასტრუქტურის სამინისტროს შორის ურთიერთთანამშრომლობის მემორანდუმი გაფორმდა. მემორანდუმი ითვალისწინებს, რეგიონალური განვითარების სახელმწიფო სტრატეგიისა და მისი სამოქმედო გეგმის განხორციელების, შეფასებისა და მონიტორინგისთვის საჭირო სტატისტიკური მონაცემების შემუშავებას რეგიონალურ განვითარებასთან დაკავშირებულ ძირითად სექტორებში.
როგორც რეგიონალური განვითარებისა და ინფრასტრუქტურის მინისტრი რამაზ ნიკოლაიშვილი განმარტავს, აღნიშნული დოკუმენტის გაფორმება, საქართველოს მთავრობისა და ევროკავშირს შორის 2011 წლის 14 ნოემბრის "საქართველოს რეგიონალური განვითარების რეფორმის მხარდაჭერის" პროგრამის დაფინანსების ხელშეკრულებით განსაზღვრული საბიუჯეტო დახმარების მერე ტრანშის (6 მლნ ევრო) ჩამორიცხვის ერთ-ერთი წინაპირობაა.
"საქსტატი" საკმაოდ მნიშვნელოვანი სამსახურია და იმ საქმიანობისთვის, რომელსაც ჩვენ ვეწევით, საუბარია რეგიონალური განვითარების გეგმა და სტრატეგია და რომელსაც ევროკავშირთან ერთად ვახორციელებთ, მნიშვნელოვანია, რომ "საქსტატის" მონაცემები იყოს სწორად წარმოებული. რაც საბოლოო ჯამში ჩვენ მოგვცემს იმის საშუალებას, რომ ვიყოთ საკმაოდ ეფექტურები რეგიონალური განვითარების გეგმის განხორციელების პირობებში"- აცხადებს რეგიონალური განვითარებისა და ინფრასტრუქტურის მინისტრი რამაზ ნიკოლაიშვილი.
"დღეს, რეგიონალური განვითარებისა და ინფრასტრუქტურის სამინისტროსთან მემორანდუმი გავაფორმეთ, რომლის ძირითადი მიზანია საქართველოს მთავრობის მიერ შემუშავებული და ევროკავშირთან შეთანხმებული გეგმის განხორციელებაში ჩვენი წვლილი შევიტანოთ. აქ საუბარია რეგიონალური სტატისტიკის განვითარებაზე, უფრო კონკრეტულად კი, ევროკავშირს გააჩნია რეკომენდაციები იმისთვის, რომ ჩვენ საიმედო და ხარისხიანი სტატისტიკა გვქონდეს. ჩვენი მიზანია, რომ "საქსტატმა" საკუთარი წვლილი შეიტანოს რეგიონალური განვითარების გეგმის განხორციელებაში"- აცხადებს "საქსტატის" აღმასრულებელი დირექტორი ზაზა ჭელიძე.