სს „ალდაგი ბისიაის" საპენსიო ფონდი, უმსხვილესი საპენსიო ფონდი საქართველოში, რომელიც იმართება ერთობლივად შპს „აბბი ასეტ მენეჯმენტისა" და სს „ალდაგი ბისიაის" მიერ, აცხადებს, რომ აქტივების მთლიანმა ღირებულებამ 7.0 მილიონ ლარს გადააჭარბა. აქტივების მთლიანი ღირებულება ბოლო 12 თვის განმავლობაში 22%-ით გაიზარდა.
,,ალდაგი-ბისიაის" საპენსიო ფონდის მონაწილე ამჟამად 8,600 ადამიანზე მეტია, რომლებიც სარგებლობენ კერძო საპენსიო სქემის მოქნილობით და უპირატესობებით, სადაც არ არის ფიქსირებული საპენსიო შენატანების ოდენობა. საპენსიო სქემის მონაწილეს საშუალება აქვს აირჩიოს სამი სახეობის პენსიიდან ერთ-ერთი, კერძოდ: მუდმივი, ვადიანი ან ერთჯერადი პენსია.
„სასიხარულოა, რომ "ალდაგი ბისიაის" საპენსიო ფონდი ინარჩუნებს ზრდის მაღალ ტემპს მიუხედავად საერთაშორისო ბაზრებზე არსებული რთული სიტუაციისა",- აღნიშნა „ალდაგი ბისიაის" გენერალურმა დირექტორმა ნიკოლოზ გამყრელიძემ.
„მოხარულნი ვართ, რომ "ალდაგი ბისიაის" საპენსიო ფონდმა გადააჭარბა აქტივების ღირებულების 7.0 მილიონიან მაჩვენებელს, რაც კიდევ უფრო გვაახლოვებს წლის ბოლოსთვის დასახული აქტივების ღირებულების 7.5 მილიონიან მაჩვენებელთან. ჩვენ მომავალშიც შევინარჩუნებთ მაღალ საინვესტიციო მოგებას, მისაღები საინვესტიციო რისკის ფარგლებში, რაც უზრუნველყოფს სქემის მონაწილეთა დანაზოგის ზრდას",- აცხადებს „აბბი ასეტ მენეჯმენტის" გენერალურმა დირექტორი ბიძინა ბეჟუაშვილი.
„ალდაგი ბისიაის“ საპენსიო ფონდი დაფუძნდა საქართველოს მოწინავე სადაზღვეო კომპანია „ალდაგი ბისიაის“ მიერ 2005 წლის ივნისში. 2012 წლის აპრილის მდგომარეობით, საპენსიო ფონდის აქტივების ღირებულება შეადგენს 7.0 მილიონ ლარს და კლიენტთა საერთო რაოდენობა 8,600 ადამიანით განისაზღვრება. „ალდაგი ბისიაის“ საპენსიო ფონდი არის
საქართველოს უმსხვილესი საპენსიო ფონდი. საპენსიო პორტფელში შედის ადგილობრივი და საერთაშორისო კომპანიების ფასიანი ქაღალდები და ფულის ბაზრის ინსტრუმენტები, გრძელვადიანი დეპოზიტების ჩათვლით.