დღეს, 10 აპრილს, 16:00 საათზე, დაბა ჩაქვში, სოფლის მეურნეობის მინისტრი ზაზა გოროზია და აჭარის მთავრობის თავმჯდომარე ლევან ვაშალომიძე იაპონური მანდარინის ნერგების დარგვის პროცესს დაესწრებიან.
იაპონური მანდარინის 8 000 ნერგი დაბა ჩაქვის ტერიტორიაზე 8 ჰა ფართობზე დაირგვება. სულ შერჩეულია 9 იაპონური ჯიში: უენო ვასე, ოკიცუ ვასე, მიაგავა ვასეს კლონი, ნიჩინან ნიჩი გოუ, ტაგუჩი ვასე, ჰარაგუჩი ვასე, მუკაიმა, კავადა და აოშიმა 4. ციტრუსი სრული დატვირთვის მსხმოიარობაში მეოთხე - მეხუთე წელს შედის, ხოლო პირველ ნაყოფს მესამე წელს იძლევა. საწარმოო სიმძლავრე სრული დატვირთვით მსხმოიარობის პირობებში 1 ჰა-ზე 20-25 ტონა ნაყოფს შეადგენს. ჯამური მოსავლიანობა 8 ჰა ზომის - ნაკვეთზე 160-200 ტონა.
უკანასკნელი ათეული წლების მანძილზე მსოფლიოში გამოიყვანეს მანდარინის ახალი პერსპექტიული ჯიშები და კლონები, რომლებიც როგორც მოსავლიანობით, ასევე ნაყოფის ხარისხით მნიშვნელოვნად აღემატება საქართველოში არსებულს. მანდარინის ჯიშების ინტროდუქციის წყაროდ შერჩეული იქნა საქართველოს სუბტროპიკული ზონის, ეკოლოგიური პირობების მსგავსი ქვეყანა - იაპონია, სადაც უნშიუს ტიპის მანდარინის წარმოება წამყვანი მიმართულებაა და საიდანაც წლების წინ საქართველოში შემოტანილი იქნა მანდარინის კულტურა.
მანდარინი საქართველოს აგრობიზნესის ერთ-ერთ მნიშვნელოვან საექსპორტო პროდუქტს წარმოადგენს, რომლის პოტენციალის გაზრდის მიზნით აუცილებელი გახდა ციტრუსის კონკურენტუნარიანობის ამაღლება და ადგილობრივი ასორტიმენტის გაუმჯობესება. ქვეყანაში მანდარინის წარმოების ხელშეწყობისთვის განსაკუთრებული მნიშვნელობა ენიჭება ადრეული სიმწიფის, ყინვაგამძლე, მაღალპროდუქტიული ჯიშების დანერგვას, რაც საშუალებას მოგვცემს მივიღოთ ხარისხიანი და კონკურენტუნარიანი ნაყოფი,ეს კი - მნიშვნელოვნად გაზრდის ქართული ციტრუსის ექსპორტს.