ხვალ, 10 აპრილს, 12:00 საათზე, ტურიზმის ეროვნული ადმინისტრაციის სასწავლო ცენტრში (სანაპიროს #4 5-ე სართული) ამერიკული სასტუმროებისა და განთავსების საგანამანათლებლო ინსტიტუტის (AHLEI) წარმომადგენელ ედ კასტლისთან შეხვედრა გაიმართება.
ტურიზმის ადმინისტრაციის ინფორმაციით, საერთაშორისო ტურიზმის სასწავლო ცენტრში პირველი ჯგუფის სასწავლო პროგრამა უკვე დაიწყო.
ედ კასტლი შეხვდება ტურიზმის ადმინისტრაციის ხელმძღვანელს მაია სიდამონიძეს, სასწავლო ჯგუფის ტრენერებს და ლექტორებს; ის ასევე შეხვდება ჯგუფის წევრებს, რათა მათ დეტალურად აუხსნას პროგრამის სპეციფიკა.
ტურიზმის ადმინისტრაციაში განმარტავენ, რომ მიმდინარე წელს საქართველოში ტურიზმისა და სასტუმროს მართვის ინდუსტრიაში პირველად დაიწყო საერთაშორისო პროგრამით კადრების გადამზადების დანერგვა. ამ პროექტმა დიდი ინტერესი გამოიწვია საზოგადოებაში. ტურიზმის სასწავლო ცენტრი პირველად ახორციელებს აღნიშნული პროგრამის მსმენელებისათვის მიწოდებას. ჩვენი მიზანია, კურსი ჩატარდეს საერთაშორისო სტანდარტების მაქსიმალური დაცვით, მიმწოდებლის მიერ დაწესებული მოთხოვნების შესაბამისად. ამისათვის, მნიშვნელოვანია მოხდეს მათი გამოცდილების გაზიარება, სწავლების მეთოდიკის სწორად განსაზღვრა და პროგრამის ავტორების მიერ სასწავლო კურსის მიმდინარეობაზე უშუალო დაკვირვებით შესაბამისი რეკომენდაციების შემუშავება.
"სწორედ ამ მიზნით, ამერიკულმა ინსტიტუტმა (AHLEI) გამოთქვა სურვილი განახორციელოს მათი წარმომადგენლის ვიზიტი სასწავლო ცენტრში 2012 წლის 8 აპრილიდან 12 აპრილამდე. სასწავლო ცენტრის სტუმარი აფრიკის, აზიისა და აღმოსავლეთის ქვეყნების მმართველი დირექტორი ედ კასტლია. მისი ვიზიტის მიზანია გაეცნოს სასწავლო ცენტრსა და შეაფასოს კურსის მსვლელობის ხარისხი; ასევე მისცეს რეკომენდაციები როგორც ტრენერებს ასევე მსმენელებს"- განმარტავენ ტურიზმის ადმინისტრაციაში.
