საქართველოს პრეზიდენტმა მიხეილ სააკაშვილმა სოფლის მეურნეობის მინისტრთან ერთად ახალი სასოფლო-სამეურნეო ტექნიკა დაათვალიერა, რომელიც მთელი საქართველოს მასშტაბით მექანიზაციის 12 სერვისცენტრში გადანაწილდება.
126 ერთეული თანამედროვე ტრაქტორი გუთნებით რეგიონებში დღეს გაიგზავნა. აპრილის ბოლომდე ბელარუსის წარმოების კიდევ 154 ერთეული სხვადასხვა სიმძლავრისა და დანიშნულების ტრაქტორი შემოვა. აღნიშნული ტექნიკის შეძენა იაპონიის საგრანტო დახმარების "2KR"-ის პროგრამის ფარგლებში დეპონირებული თანხით განხორციელდა.
წლის განმავლობაში იგეგმება რამდენიმე ასეული ევროპული წარმოების თანამედროვე ტრაქტორისა და სასოფლო-სამეურნეო დანიშნულების ტექნიკის შემოყვანა.
"მთლიანობაში 280 ერთეული ბელარუსის წარმოების და 300 ერთეული ევროპული წარმოების ტექნიკა შემოვა. აქ იქნება პლევმატური სათესები, გუთნები, მისაბმელები და ყველა საჭირო ტექნიკა, რაც გლეხებს და ფერმერებს მიწის დამუშავებისთვის სჭირდებათ. თანამედროვე ტრაქტორების შემოყვანა დარგის განვითარებას მნიშვნელოვნად შეუწყობს ხელს", - განაცხადა გოროზიამ.
სოფლის მეურნეობის სამინისტროს ინიციატივით მოხდა მექანიზატორების გადამზადება, რათა სრულფასოვნად ყოფილიყო გამოყენებული და ათვისებული ახალი ტექნიკის შესაძლებლობები.
ახალი, თანამედროვე ტექნიკის შემოყვანა და დანერგვა ხელს შეუწყობს კიდევ უფრო მეტი მიწის დამუშავებას, ადგილობრივი პროდუქციის და შემოსავლების ზრდას.