საჯარო რეესტრის ეროვნული სააგენტოს ინფორმაციით, 2012 წლის მარტში ქვეყანაში რეგისტრირებული ბიზნეს სუბიექტების რაოდენობამ 4 179 ერთეული შეადგინა, რომელთა შორის 97.5% სამეწარმეო სუბიექტია (ინდივიდუალური მეწარმე, სოლიდარული პასუხისმგებლობის საზოგადოება, შეზღუდული პასუხისმგებლობის საზოგადოება, სააქციო საზოგადოება, კომანდიტური საზოგადოება, კოოპერატივი, უცხოური სამეწარმეო იურიდიული პირის ფილიალი), ხოლო 2.5% - არასამეწარმეო სუბიექტი (არასამეწარმეო იურიდიული პირი, უცხოური არასამეწარმეო იურიდიული პირის ფილიალი, საჯარო სამართლის იურიდიული პირი). ამავე თვეში ბიზნესის რეგისტრაციის თვის ინდექსი (დეკემბერი 2010=100) გაიზარდა და 0.955 დონეზე დაფიქსირდა.
საჯარო რეესტრის ეროვნული სააგენტოში განმარტავენ, რომ მარტში 2011 წლის იმავე თვესთან (4 772 ბიზნეს სუბიექტი) შედარებით კლება (12.4%-ით), ხოლო წინა თვესთან შედარებით ზრდა დაფიქსირდა (4.0%-ით).
2012 წლის მარტის თვეში წინა წლის იმავე თვესთან შედარებით რეგისტრირებული სამეწარმეო სუბიექტების რაოდენობა 12.4%-ით, ხოლო არასამეწარმეო სუბიექტების რაოდენობა 12.0%-ით შემცირდა. განსხვავებული ტენდენცია დაფიქსირდა წინა თვესთან შედარებით: მარტის თვეში რეგისტრირებული სამეწარმეო სუბიექტების რაოდენობა 5.0%-ით გაიზარდა, ხოლო არასამეწარმეო სუბიექტების რაოდენობა 24.3%-ით შემცირდა. ამავე თვეში ბიზნესის რეგისტრაციის თვის ინდექსი (დეკემბერი 2010=100) სამეწარმეო და არასამეწარმეო სუბიექტების მიხედვით შესაბამისად 0.959 და 0.811 დონეებზე დაფიქსირდა.
მარტში ბიზნეს სუბიექტთა უმეტესობა დარეგისტრირდა ინდივიდუალური მეწარმის (2 836 ერთეული, ანუ რეგისტრირებულ ბიზნეს სუბიექტთა 67.9%) და შეზღუდული პასუხისმგებლობის საზოგადოების (1 229 ერთეული, ანუ რეგისტრირებულ ბიზნეს სუბიექტთა 29.4%) სახით. როგორც ჩანს, ბიზნეს სუბიექტთა 97.3% მხოლოდ აღნიშნულ სამართლებრივ სტატუსებს ანიჭებს უპირატესობას. ამავე თვეში ქვეყანაში დარეგისტრირდა 102 არასამეწარმეო იურიდიული პირი, 5 უცხოური სამეწარმეო იურიდიული პირის ფილიალი, 3 სააქციო საზოგადოება, 2 კოოპერატივი, 1 სოლიდარული პასუხისმგებლობის საზოგადოება და 1 უცხოური არასამეწარმეო იურიდიული პირის ფილიალი.
