ფინანსთა მინისტრი 2011 წელს დადებითად აფასებს და აცხადებს, რომ 2011 წელს ქვეყნის ეკონომიკა მნიშვნელოვანი ტემპებით იზრდებოდა. დიმიტრი გვინდაძემ დღეს, ფინანსთა სამინისტროში 2011 წლის ბიუჯეტის შესრულების ანგარიში წარმოადგინა და განმარტა, რომ 2011 წელს მთლიანი შიდა პროდუქტის რეალურმა ზრდამ 7% შეადგინა, რის შედეგადაც 2010 წელთან შედარებით საქართველოს ეკონომიკა 3,5 მილიარდი ლარით გაიზარდა.
"სწორი საბიუჯეტო დაგეგმარების პირობებში, შემცირებულია საბიუჯეტო დეფიციტი, საგრძნობლად შემცირდა სახელმწიფო ვალის შეფარდება მთლიან შიდა პროდუქტთან. გაიზარდა ასიგნებები მთელ რიგ სექტორზე, მათ შორის ჯანდაცვა, სოციალური უზრუნველყოფა, განათლება, სოფლის მეურნეობა და ინფრასტრუქტურული განვითარება"- აღნიშნა ფინანსთა მინისტრმა.
დიმიტრი გვინდაძის განმარტებით, 2011 წლის ბოლოსთვის ერთ სულ მოსახლეზე მშპ-მ 3 215,4 აშშ დოლარი შეადგინა, რაც 2010 წლის ბოლოსთვის არსებულ მაჩვენებელზე 592,4 აშშ დოლარით მეტია.
"სწორი საბიუჯეტო დაგეგმარების შედეგად საბიუჯეტო დეფიციტის მაჩვენებელი სწრაფი ტემპებით მცირდება და 2011 წლის ბოლოსთვის მშპ-სთან მიმართებაში 3,6%-ს შეადგენს"- აღნიშნა ფინანსთა მინისტრმა.
მისივე ინფორმაციით, უზრუნველყოფილია სახელმწიფო ვალის მდგრადობა. მშპ-სთან მიმართებაში მთლიანი სახელმწიფო ვალის მაჩვენებელი 2010 წლის ბოლოსთვის არსებული 42,4%-იდან, 2011 წლის ბოლოსთვის 36,7%-მდე, ხოლო საგარეო ვალის მაჩვენებელი მშპ-ს 33,6%-დან 29,0%-მდე შემცირდა;
2011 წლის განმავლობაში სახელმწიფო ბიუჯეტში მობილიზებულმა სახსრებმა 7 437,0 მლნ ლარი შეადგინა, მათ შორის საგადასახადო შემოსავლები 5 802,0 მლნ ლარს შეადგენს, რაც 2010 წლის მაჩვენებელზე 1 209,6 მლნ ლარით მეტია;
2011 წელს სახელმწიფო ბიუჯეტიდან გაწეულმა კი ხარჯებმა 7 459,3 მლნ ლარი შეადგინა, რაც 2010 წლის მაჩვენებელზე 487,0 მლნ ლარით მეტია;
ფინანსთა სამინისტროში განმარტავენ, რომ2011 წლის ბიუჯეტიდან 2010 წელთან შედარებით გაზრდილი მოცულობით დაფინანსდა ყველა პრიორიტეტული მიმართულება, მათ შორის: შრომის, ჯანმრთელობისა და სოციალური დაცვის სამინისტროს დაფინანსება გაიზარდა 69,2 მლნ ლარით და 1 641,6 მლნ ლარი შეადგინა; განხორციელდა ასევე ასაკით პენსიონერებისა და პირველი კატეგორიის ინვალიდების პენსიის 20 ლარით ზრდა; 2011 წელს მოსახლეობის საპენსიო უზრუნველყოფაზე მიიმართა 987,3 მლნ ლარი, ხოლო მოსახლეობის ჯანმრთელობის დაცვის პროგრამებზე და მათ დაზღვევაზე 277,2 მლნ ლარი დაიხარჯა.
რაც შეეხება განათლების და მეცნიერების სამინისტროს დაფინანსებას ის 27,4 მლნ ლარით გაიზარდადა 552,5 მლნ ლარი შეადგინა;
"განხორციელდა ყველა სერთიფიცირებული მასწავლებლის ხელფასების ზრდა, ხოლო სერთიფიცირებული მასწავლებლების საუკეთესო 25%-ს დაენიშნად 1000 ლარიანი ხელფასი"- აღნიშნა ფინანსთა მინისტრმა.
ფინანსთა მინისტრის განმარტებით, 2011 წელს აშენდა 5 ახალი და რეაბილიტაცია ჩაუტარდა 250-ზე მეტ საჯარო სკოლას; სოციალურად დაუცველი ოჯახების ყველა მოსწავლე უზრუნველყოფილ იქნა სასკოლო სახელმძღვანელოებით; საგზაო ინფრასტრუტურაზე მიმართული სახსრები გაიზარდა 30,9 მლნ ლარით და 580,8 მლნ ლარი შეადგინა;
აღსანიშნავია, რომ 2011 წელს სოფლის მეურნეობის დასაფინანსებლად სახელმწიფო სახსრები (საგარეო დაფინანსების გარდა) 4-ჯერ გაიზარდა და 74,2 მლნ ლარი შეადგინდა;
იმავდროულად, განხორციელდა სხვა ინფრასტრუქტურლი პროექტები (მ.შ. ენერგოინფრასტრუქტურა, წყალ-კანალიზაცია, დევნილთა სახლების მშენებლობა-რეაბილიტაცია, მუნიციპალური ინფრასტრუქტურის განვითარება და სხვა)