„ვისოლ პეტროლიუმ ჯორჯია" კომპანია Global Idea-ს და გაზეთ The FINANCIAL -ის მიერ ორგანიზებულ ბიზნეს დაჯილდოებაზე - „ოქროს ბრენდი" ნავთობსექტორში 2011 წლის რჩეულ ბრენდად აღიარეს.
„2010 წელს ვისოლ ჯგუფი ევროპის ბიზნეს დაჯილდოების წარმატებულ კომპანიათა ათეულში მოხვდა. თუმცა ჯილდო, რომელიც დღეს მოგვანიჭა ჩვენმა მომხმარებელმა და ზოგადად ქართველმა საზოგადოებამ ვისოლ ჯგუფისათვის არანაკლებ მნიშვნელოვანია. ჩვენ ბიზნესს ვაკეთებთ საქართველოში, ვემსახურებით ადგილობრივ მომხმარებელს და ბუნებრივია, ამ კონკურსზე ჩვენი საქმიანობის ასეთი სახით აღიარება არის ჩვენთვის აუღრესად დიდი სიხარულის მომგვრელი ფაქტი". - განაცხადა ვისოლ ჯგუფის სამეთვალყურეო საბჭოს თავმჯდომარემ სოსო ფხაკაძემ.
Global Idea-ს და გაზეთ The FINANCIAL -ის ყოველწლიური ბიზნეს დაჯილდოვება სასტუმრო რადისონ ბლუ ივერიაში წელს მეშვიდედ გაიმართა თბილისის მერიის, საქართველოს სავაჭრო-სამრეწველო პალატის და ამერიკის სავაჭრო პალატის მხარდაჭერით.
„ოქროს ბრენდი" ავლენს და აჯილდოვებს იმ კომპანიებს, რომლებმაც ბიზნეს საქმიანობაში განსაკუთრებულ წარმატებას მიაღწიეს. ბრენდის, სავაჭრო ნიშნის ცნობადობას და მისი პოპულარიზაციისთვის განხორციელებულ პროექტებს 200 -მდე ექსპერტი აფასებდა. გამოკითხვის შედეგები, საქართველოს სავაჭრო პალატის, ამერიკის სავაჭრო პალატის, კომპანია Global Idea-ს და გაზეთ The FINANCIAL -ის წარმომადგენელთა მიერ, გამოკითხულ ექსპერტთა ხმათა დათვლით დაჯამდა.