ხვალ, 5 აპრილს, ფინანსთა მინისტრი დიმიტრი გვინდაძე 2011 წლის ბიუჯეტის შესრულების ანგარიშს წარმოადგენს.
როგორც სააგენტო "ჯი-ეიჩ-ენს" ფინანსთა სამინისტროდან აცნობეს, ფინანსთა მინისტრი დიმიტრი გვინდაძე 5 აპრილს ფინანსთა სამინისტროში ბრიფინგს გამართავს და საზოგადოებას 2011 წლის ბიუჯეტის შესრულების ანგარიშს გააცნობს.
2011 წელს ეკონომიკურმა განვითარებამ მნიშვნელოვანი გავლენა იქონია ნაერთი ბიუჯეტის შემოსულობების ზრდაზე. შემოსავლების სახით 2011 წელს მობილიზებულ იქნა 6 970.3 მლნ ლარი, რაც საპროგნოზო მაჩვენებლის (6 961.5 მლნ ლარი) 100.1%-ია. შემოსავლების საერთო მოცულობა გასულ წელთან შედარებით 18.8%-ით გაიზარდა. შემოსავლების მოცულობამ მთლიანი შიდა პროდუქტის 28.8% შეადგინა. გადასახადების სახით 2011 წელს მობილიზებულ იქნა 6 134.8 მლნ ლარი, რაც საპროგნოზო მაჩვენებლის (6 090.0 მლნ ლარი) 100.7%-ია. გადასახადების საერთო მოცულობა გასულ წელთან შედარებით 26.0%-ით გაიზარდა, ხოლო მისი წილი შემოსავლების 88.0% შეადგენს. გადასახადების მოცულობამ მთლიანი შიდა პროდუქტის 25.3% შეადგინა.