"პროკრედიტ ბანკი საქართველოს" მენეჯმენტმა დღეს გამართულ ბრიფინგზე საზოგადოებას 2012 წლის გეგმები გააცნო. როგორც ბანკის გენერალურმა დირექტორმა მაია მერედოვამ განაცხადა, 2012 წელს ბანკი განაგრძობს 2011 წელში წამოწყებული პროექტების დანერგვას, რომლებიც მიმართული იყო მომსახურების სისწრაფისა და ხარისხის გაუმჯობესებისკენ.
2012 წელს ძირითადი ძალისხმევა არსებული ფილიალების გარემოტებას დაეთმობა; რამდენიმე ფილიალისთვის შეირჩევა უკეთესი მდებარეობა. ახალი ფილიალი შენდება მარნეულში, რომლის გახსნა 2012 წლის შემოდგომაზეა დაგეგმილი; მცირე და საშუალო ბიზნესის კლიენტებისთვის ახალი ბიზნესცენტრები გაიხსნება ბათუმსა და თბილისში, თავისუფლების მოედანზე.
"ახალი სათავო ოფისის მშენებლობა დასრულდება 2012 წლის ზაფხულში. თანამედროვე, 12000 კვმ შენობა, მიმდებარე პარკითა და მიწისქვეშა ავტოსადგომით, 3 ფუნქციას გააერთიანებს: სათავო ოფისი, ტრენინგცენტრი და ბანკის ცენტრალური ფილიალი. 7-სართულიან შენობას შუშისჭერიანი ატრიუმი აქვს; ამ უზარმაზარი სივრცეში, სადაც კლიენტების სასიამოვნო გარემო დახვდებათ, ყველა პირობა იქნება შექმნილი იმისათვის, რომ ბანკის საქმიანობა წარიმართოს მაქსიმალური ეფექტურობით. შენობა აგებულია უსაფრთხოების საერთაშორისო სტანდარტების უმკაცრესი დაცვით. ეს მნიშვნელოვანი ინვესტიცია ნათლად გამოხტავს პროკრედიტ ბანკის შორს მიმავალ გეგმებს თანამშრომლებისა და საქართველოს მიმართ", - აღნიშნა მერედოვამ.
მერედოვას განმარტებით, ვინაიდან "პროკრედიტ ბანკს" მიაჩნია, რომ ყველაზე ღირებული აქტივი მისი კადრებია, 2012 წელს პრიორიტეტად დარჩება თანამშრომელთა პროფესიული განვითარება და ტრენინგები.