უკრაინა სსრკ-ის შემნახველი ბანკის მეანაბრეებზე კომპენსაციების გაცემას აგრძელებს უკრაინის სახელმწიფო "ოშადნი ბანკი", რომელიც შემნახველ ბანკს 1991 წელს გამოეყო, გაუფასურებული საბჭოთა ანაბრების მფლობელებს წლის ბოლომდე 746,6 მილიონი აშშ დოლარის (6 მილიარდი გრივნი) კომპენსაციას გასცემს.
თანხა სპეციალურ ბარათზე ჩაირიცხება. კომპენსაციის გაცემა კლიენტების მონაცემთა ბაზის განახლებისთანავე დაიწყება.
ბანკში უკვე დაიწყეს სსრკ-ს შემნახველი ბანკის იმ მეანაბრეების მონაცემების შემოწმება, რომლებსაც ამ დრომდე არ მიუღიათ კომპენსაცია.
როგორც ბანკის წარმომადგენლები აცხადებენ, კომპენსაციები მათზე გაიცემა, ვისაც 2008 წელს, ყოფილი პრემიერ-მინისტრის იულია ტიმოშენკოს ინიციატივით დაწყებული კომპენსაციების გაცემის დროს, ვერ შეხვდა საკუთარი წილი. მაშინ პრემიერ-მინისტრის ამ გადაწყვეტილებას იმდროინდელი პრეზიდენტი ვიქტორ იუშჩენკო აკრიტიკებდა.
2008 წელს კომპენსაცია 6 მილიონამდე ადამიანმა მიიღო. წელს კომპენსაციას ასევე 6 მილიონამდე ადამიანი მიიღებს. კომპენსსაციის გაცემის ინიციატივა ამჯერად ქვეყნის პრეზიდენტის ვიქტორ იანუკოვიჩის სოციალური პროგრამის შემადგენელი ნაწილია, რომელიც 2012 წლის მარტში გამოქვეყნდა.
ბანკის ხელმძღვანელი სერგეი პოდრეზოვი აცხადებს, რომ 6 მილიონი ადამიანი მიიღებს კომპენსაციას 1000 გრივნის ოდენობით. თანხები სპეციალურ ბარათებზე დაირიცხება.
მენაბრემ თანხის მისაღებად რეგისტრაცია ინტერნეტის მეშვეობით უნდა გაიაროს. უკრაინის ხელიუფლებაში დარწმუნებულნი არიან, რომ კომპენსაციის გაცემა ქვეყანაში ინფლაციას არ გამოიწვევს.
"კომპენსაციები ეტაპობრივად, თვეში მილიარდი გრივნის ოდენობით გაიცემა, რაც ეკონომიკურ პროცესებზე უარყოფით გავლენას ვერ მოახდენს", - განაცხადა პოდრეზოვმა.