2012 წლის მარტში 2011 წლის მარტთან შედარებით ინფლაციის დონემ საქართველოში -2,2 პროცენტი შეადგინა. "საქსტატის" ინფორმაციით, 12-თვიან პერიოდში აღნიშნული მაჩვენებლის ფორმირებაში ძირითადი გავლენა იქონია ფასების ცვლილებამ სურსათი და უალკოჰოლო სასმელების ჯგუფზე და ასევე ტრანსპორტი:ს ჯგუფზე.
სურსათი და უალკოჰოლო სასმელები: მოცემულ პერიოდში ფასები შემცირდა 7,5 პროცენტით და ჯგუფის წვლილმა წლიური ინფლაციის საერთო მაჩვენებელში -3,6 პროცენტული პუნქტი შეადგინა. ფასების კლების მაღალი მაჩვენებლები დაფიქსირდა შემდეგ ქვეჯგუფებზე: ხილი და ყურძენი (34,3
პროცენტი), ბოსტნეული, ბაღჩეული, კარტოფილი და სხვა ბოლქვოვანები (17,8 პროცენტი), შაქარი და სხვა ტკბილეული (14,4 პროცენტი). ფასები გაიზარდა ხორცი და ხორცის პროდუქტების ქვეჯგუფზე (10,9 პროცენტი).
ტრანსპორტი: ფასები გაიზარდა 11,9 პროცენტით. შესაბამისად, ჯგუფის წვლილმა წლიური ინფლაციის მაჩვენებელში 1,2 პროცენტული პუნქტი შეადგინა. აღნიშნულ ჯგუფში ფასების მნიშვნელოვანი მატება დაფიქსირდა სატრანსპორტო მომსახურების ქვეჯგუფზე (19,3 პროცენტი) და პირადი სატრანსპორტო საშუალებების ექსპლუატაციის ქვეჯგუფზე (4,1 პროცენტი).
