ხვალიდან, 4 აპრილიდან, თელავის განახლებულ ნაწილში ტურიზმის საინფორმაციო ცენტრი და მანქანების გაქირავების ტრანსნაციონალური კომპანია hertz-ის ფილიალი იწყებს ფუნქციონირებას.
ხვალ, 4 აპრილს 13:00 საათზე, ახალ ობიექტს ტურიზმის ეროვნული ადმინისტრაციის ხელმძღვანელი მაია სიდამონიძე და კახეთის გუბერნატორი გიორგი ღვინიაშვილი გახსნიან.
ტურიზმის საინფორმაციო ცენტრი ყველა დაინტერესებულ პირს მიაწვდის ინფორმაციას როგორც ტრანსპორტირების, განთავსებისა და კვების ობიექტების შესახებ, ასევე სხვადასხვა სახის სერვისსა და საექსკურსიო მომსახურებას შესთავაზებს. შენობა. რომელშიც განთავსებულია ტურიზმის საინფორმაციო ცენტრი, კულტურული მემკვიდრეობის ძეგლს წარმოადგენს და მისი აღდგენა პირვანდელი სახით მოხერხდა. მალე ბოლომდე დასრულდება თელავის ცენტრალური სკვერი, იქ ჩატარებული ინფრასტრუქტურული სამუშაოს გარდა, პარკი აღჭურვილი იქნება უფასო უსადენო ინტერნეტსერვისით და სულ მალე თელავის მთავარ თავშეყრის ადგილად გადაიქცევა.
მნიშვნელოვანია, რომ კახეთი არის პირველი რეგიონი, სადაც მანქანების გაქირავების ტრანსნაციონალური კომპანია hertz-ის ფილიალი დაიწყებს ფუნქციონირებას, რაც თავისთავად უზრუნველყოფს კახეთის რეგიონში შიდა და უცხოელი ტურისტების უსაფრთხო და კომფორტულ მოგზაურობას. ადგილობრივ ბაზარზე შესვლა ისეთი საერთაშორისო და ცნობადი ბრენდის როგორიცაა hertz-ი, გამოიწვია კახეთში ბოლო პერიოდში დაგეგმილმა ღონისძიებებმა და ტურისტების ნაკადის ზრდამ.
