"ძალიან სასიამოვნოა პრეზიდენტ სააკაშვილის ნახვა და მისალმება კიდევ ერთხელ ნატოს შტაბ-ბინაში. ჩვენ ერთმანეთს ბოლოს რამდენიმე თვის წინ ბათუმში შევხვდით სადაც პრეზიდენტი ჩრდილოატლანტიკური საბჭოს სხდომას მასპინძლობდა, ახლა საბჭო უმასპინძლებს მას", _ განაცხადა ნატოს გენერალურმა მდივანმა საქართველოს პრეზიდენტის მისასალმებელ სიტყვაში ბრიუსელში გამართულ ერთობლივ პრესკონფერენციაზე.
მისივე თქმით, საქართველოსა და ნატოს დიალოგი არის "ყოვლისმომცველი, ინტენსიური და ორმხრივი".
"საქართველო ნატოსათვის განსაკუთრებული პარტნიორია, თქვენ პასუხისმგებლობით ეკიდებით ჩვენს ოპერაციებს, ნატოში გაწევრიანებასა და რეფორმებს. თქვენ იკვე შეგაქვთ თქვენი წვლილი, როგორც ნატოს რიგით მეორე არაწევრ ქვეყანას თქვენი კონტიგენტის სიდიდის მიხედვით ავღანეთის მისიაში და წლის ბოლოსათვის საქართველო გახდება პირველი ქვეყანა, რომელსაც ყველაზე მრავალრიცხოვანი კონტიგენტი ეყოლება ავღანეთში ჩვენს პარტნიორებს შორის", - აცხადებს რასმუსენი.
მისივე თქმით, რამდენიმე ქართველმა ჯარისკაცმა საკუთარი სიცოცხლე გაიღო "ჩვენი საერთო საქმისათვის".
"ვაფასებთ მათ თავგანწირვას და თანავუგრძნობთ მათ ოჯახებს", _ აცხადებს რასმუსენი.