ქართული მინერალური სასმელების პოპულარიზაციის მიზნით დღეს ქართული მინერალური წყლების და უალკოჰოლო სასმელების გამოფენა გაიმართა, რომლის ორგანიზებაც სოფლის მეურნეობის სამინისტროს ეკუთვნის. გამოფენის მთავარი მიზანი, ქართული სასმელების უკეთ წარმოჩინება და შიდა ბაზარზე უფრო მეტი პოპულარიზაციაა.
სოფლის მეურნეობის მინისტრის მოადგილე ეთერ ყამარაული აცხადებს, რომ სამინისტრო ქართული პროდუქციის პოპულარიზაციისთვის ყველაფერს აკეთებს.
"სოფლის მეურნეობის სამინისტრო დღეს ქართული მინერალური წყლებისა და უალკოჰოლო სასმელების მწარმოებელ კომპანიებს მასპინძლობს. გამოფენის მთავარი მიზანი, ქვეყნის შიგნით, ქართული პროდუქციის პოპულარიზაციაა. რადგანაც არსებობენ კომპანიები, რომლებიც საქართველოს მოსახლეობისთვის მეტ-ნაკლებად, ან ძალიან ცნობადები არიან. ამიტომ ჩვენი მიზანია, რომ ყველანაირი პროდუქცია, რაც კი საქართველოში იწარმოება მოსახლეობამ უფრო კარგად გაიცნოს"- განმარტავს ეთერ ყამარული.
გამოფენაში 16 ქართული კომპანია მონაწილეობდა (აკვა გეო, ყაზბეგი, კასტელი, კულა, ნაბეღლავი, ბორჯომი, კამპა, საირმე, რაჭის წყაროები, ნატახტარი, ბიოპროდუქტი, შხეფი, ფლატე, წყალი გუნდაური, სუფთა წყალი ბინული, ლაღიძის წყლები), რომლებიც განმარტავენ, რომ ასეთ ინიციატივებს მიესალმებიან, რადგანაც მსგავს გამოფენებში მონაწილეობა მათთვის არის უფასო რეკლამირების საშუალება და იმავდროულად კომპანიებს საშუალება აქვთ საკუთარი პროდუქცია უკეთ წარმოაჩინონ და მომხმარებლებს შესთავაზონ.
გამოფენაში მონაწილე "ბიოპროდუქტები", რომლის ასკილის წვენმაც ლონდონში "ფუნქციური სასმელების ინოვაციების საერთაშორისო კონკურსზე" "საუკეთესო იმუნიტეტის გამაძლიერებელი სასმელის" წოდება მოიპოვა, სამომავლოდ ადგილობრივ ბაზარზე კიდევ უფრო გააქტიურებას გეგმავს. კომპანიის მენეჯმენტის ინფორმაციითვე, ქართული ასკილის წვენი მალე იაპონიაშიც გაიყიდება და ამომავალი მზის ქვეყანაში მოსახლეობას მისი დაგემოვნების საშუალება მიეცემა.
"ჩვენი კომპანია სულ რაღაც ორი წელია, რაც შეიქმნა. მისი ბოლო წარმატება იყო, ის რომ ასკილის წვენმა ლონდონის საკმაოდ პრესტიჟულ კონკურსზე "საუკეთესო იმუნიტეტის გამაძლიერებელი სასმელის" წოდება მოიპოვა. კონკურსზე ასევე მოგვანიჭეს სპეციალური ლოგო, და ვაპირებთ, რომ ეს ლოგო ჩვენს ეტიკეტზე დავიტანოთ. რაც თავის მხრივ ხელს შეუწყობს პროდუქციის პოპულარიზაციას ქართულ ბაზარზე ."ბიოპროდუქტებს" ასევე მოლაპარაკებები აქვს იაპონურ მხარესთან და მინდა გითხრათ, რომ თითქმის გადაწყვეტილია და მაისის დასაწყისში, ამომავალი მზის ქვეყანაში პირველ სანიმუშო პარტიას გადავგზავნით'- განაცხადა "ბიოპროდუქტების" დირექტორმა გიორგი აბაშიძემ.
კომპანია "გუნდაურისთვის", რომელიც ბაზარზე სულ ახლახანს გამოჩნდა ქართული მინერალური წყლების და უალკოჰოლო სასმელების გამოფენაზე მონაწილეობა დიდი დატვირთვის მატარებელია, რადგანაც კომპანიას საშუალება მიეცა აჭარაში ჩამოსხმული წყალი "გუნდაური" ფართო საზოგადოებას წარუდგინოს, მით უმეტეს, რომ "გუნდაური" თბილისში შემოსვლას და მთლიანად რეგიონების მოცვას და ქართულ ბაზარზე მყარად ადგილის დამკვიდრებას გეგმავს.
"გუნდაური" საკმაოდ ახალი კომპანიაა და მისი სახელწოდება მის წარმოშობასთან არის დაკავშირებული. წყლის ჭაბურღილი აჭარის მთიან რეგიონში, სოფელ გუნდაურში მდებარეობს. "გუნდაური" მაქსიმალურად ცდილობს, რომ წყალი "გუნდაური" წარმოაჩინოს და ხალხს გააცნოს, რადგანაც ჯერ ქვეყნის მასშტაბით ფართოდ არ ვართ წარმოდგენილნი"- აცხადებს "გუნდაურის" წარმომადგენელი ნინო ჩომახაშვილი.
აღსანიშნავია, რომ სოფლის მეურნეობის სამინისტრო მუდმივად უჭერს მხარს ქართულ კომპანიებს ახალი საექსპორტო ბაზრების ათვისებაში. აღნიშნული გამოფენაც სწორედ ქართული პროდუქციის პოპულარიზაციასა და საექსპორტო პოტენციალის ზრდას ემსახურებოდა. როგორც სოფლის მეურნეობის სამინისტროში განმარტავენ მომავალ თვეში ყველის გამოფენის მოწყობა იგეგმება, სადაც ქართულ კომპანიებს საკუთარი ნაწარმის რეკლამირებისა და უკეთ წარმოჩინების საშუალება მიეცემათ.