წელს აჭარაში განხორციელებული ინვესტიციების მოცულობა 14 %-ით გაიზარდა. როგორც სააგენტო "ჯი-ეიჩ-ენს" აჭარის ფინანსთა და ეკონომიკის სამინისტროდან აცნობეს, 2012 წლის პირველ კვარტალში აჭარაში განხორციელებული ინვესტიციების მოცულობამ 42,5 მლნ დოლარი შეადგინა, რაც გასული წლის ანალოგიურ მაჩვენებლებთან 14 %-ით მეტია. სტატისტიკური ინფორმაციის თანახმად, 2011 წლის პირველ კვარტალში რეგიონში 37,3 მლნ დოლარის ინვესტირება მოხდა. სამინისტროს ინფორმაციით, იანვარ-მარტში აჭარაში განხორციელებული ინვესტიციების 45 %-ი, ანუ 23,3 მლნ დოლარი ადგილობრივ ინვესტიციებზე, ხოლო დარჩენილი 55 %-ი (19,2 მლნ დოლარი) უცხოელ ინვესტორებზე მოდის.
აჭარის ფინანსთა და ეკონომიკის სამინისტროს ინფორმაციით, 2012 წლის პირველ კვარტაში ეკონომიკის სხვადასხვა დარგებში განხორციელებული ინვესტიციებიდან მშენებლობა და ტურიზმი ლიდერობს. სტატისტიკური ინფორმაციის მიხედვით, 2012 წლის იანვარ-მარტში აჭარაში მშენებლობის სექტორში 21,2 მლნ დოლარია ინვესტირებული, ტურიზმის სექტორში - 19 მლნ. დოლარი, სოფლის მეურნეობის სექტორში - 1,1 მლნ დოლარი, მრეწველობის სექტორში - 0,8 მლნ დოლარი, ხოლო ეკონომიკის სხვა დანარჩენ დარგებში კი მხოლოდ 0,4 მლნ დოლარია ინვესტირებული.