1-ელი აპრილიდან, ევროკავშირთან გაფორმებული ხელშეკრულება, გეოგრაფიული აღნიშვნების დაცვის შესახებ, ამოქმედდება. 2-5 აპრილს ევროკავშირის პროექტის TAIEX-ის მხარდაჭერით "საქპატენტის" დელეგაცია თავმჯდომარის ირაკლი ღვალაძის ხელმძღვანელობით მიემგზავრება საფრანგეთში ადგილწარმოშობისა და ხარისხის ეროვნულ ინსტიტუტში (INAO) სამუშაო ვიზიტით.
სამუშაო შეხვედრის ფარგლებში განხილული იქნება საფრანგეთის გამოცდილება სოფლის მეურნეობის პროდუქციის ადგილწარმოშობის დასახელებების რეგისტრაციისა და დაცვის მიმართულებით.
იმის გათვალისწინებით, რომ საქართველოსა და ევროკავშირს შორის ხელი მოეწერა გეოგრაფიული აღნიშვნების დაცვის შესახებ შეთანხმებას, რომელიც ძალაში შედის 2012 წლის 1 აპრილიდან, მნიშვნელოვანია აღნიშნული ვიზიტისას საფრანგეთის, როგორც ევროპაში ადგილწარმოშობის დასახელებების რეგისტრაციის რაოდენობით ერთ-ერთი წამყვანი ქვეყნის გამოცდილების გაზიარება.
ვიზიტის ფარგლებში გათვალისწინებულია ცნობილი მევენახეობის რეგიონების შამპანისა და ბორდოს დათვალიერება. ასევე დაგეგმილია შეხვედრები INAO-ს დირექტორთან ჟან ლუი ბუერთან.
სამუშაო ვიზიტში ასევე ჩართულნი არიან საქართველოს სოფლის მეურნეობის სამინისტროსა და საფრანგეთში საქართველოს საელჩოს წარმომადგენლები.