შემოსავლების სამსახურსა და საქართველოს ბუღალტერთა და აუდიტორთა ფედერაციას (ბაფ-ი) შორის თანამშრომლობის შესახებ მემორანდუმი გაფორმდა. მემორანდუმს ხელი მოაწერეს შემოსავლების სამსახურის უფროსმა, ჯაბა ებანოიძემ და საქართველოს ბუღალტერთა და აუდიტორთა ფედერაციის გამგეობის თავმჯდომარემ, ზურაბ ლალაზაშვილმა.
მემორანდუმის მიზანია, საზოგადოებისათვის ხარისხიანი მომსახურების უზრუნველყოფის მიზნით, მხარეებმა განავითარონ ეფექტური სტრატეგია, ხელი შეუწყონ პროფესიონალი კადრების ზრდას და მათი კვალიფიკაციის ამაღლებას, თეორიული ცოდნის პრაქტიკაში გამოყენების შესაძლებლობას.
თანამშრომლობა 4 მიმართულებით განხორციელდება: შემოსავლების სამსახურის თანამშრომლების სწავლება, სასწავლო პროგრამების სრულყოფა-გაუმჯობესება, პროფესიონალი კადრების ზრდის ხელშეწყობა და დასაქმება.
„პრაქტიკა და სტატისტიკა გვიჩვენებს, რომ კომპანიებში დაშვებული შეცდომების უმეტესობა სწორედ ბუღალტრების შეცდომებზე მოდის. მიგვაჩნია, რომ ამ თანამშრომლობის შედეგად, ავამაღლებთ ბუღალტრების განათლების დონეს და ხელს შევუწყობთ მათ დასაქმებას. ასევე, კომპანიები უფრო ნაკლებ შეცდომებს დაუშვებენ და ნაკლები თანხები დაეხარჯებათ სხვადასხვა ჯარიმებსა და საურავებში", - განაცხადა შემოსავლების სამსახურის უფროსმა ჯაბა ებანოიძემ.
თანამშრომლობის ფარგლებში, მხარეები შეიმუშავებენ ინფორმაციულ და სასწავლო-მეთოდოლოგიური მხარდაჭერის მექანიზმებს. შეთანხმების შედეგად, დაინერგება შემოსავლების სამსახურის თანამშრომელთა კვალიფიკაციის ამაღლებისა და პერიოდული გადამზადების სისტემა. ბაფ-ის მსმენელებისათვის/სტუდენტებისთვის შესაძლებელი იქნება შემოსავლების სამსახურში პრაქტიკული ცოდნის და გამოცდილების მიღება. შეიქმნება ბაფ-ის მსმენელების/სტუდენტების და კურსდამთავრებულთა ერთიანი, სისტემატიზებული და განახლებადი მონაცემთა ბაზა. შემუშავდება საქართველოს პროფესიონალ ბუღალტერთა და აუდიტორთა ფედერაციის წევრებსა და სტუდენტებს შორის შემოსავლების სამსახურში ვაკანტური პოზიციების დასაკავებლად გამოცხადებული კონკურსის შესახებ ინფორმაციის გავრცელების მექანიზმები.
„მემორანდუმის გაფორმების მთავარი მიზანი გახლავთ ის, რომ შედგეს თანამშრომლობა შემოსავლების სამსახურსა და საქართველოს პროფესიონალ ბუღალტერთა და აუდიტორთა ფედერაციას შორის. ფედერაცია შემოსავლების სამსახურში მომუშავეთა პერიოდულ გადამზადებას უზრუნველყოფს. ბაფის სტუდენტებისთვის კი, თავის მხრივ, შესაძლებელი იქნება უწყებაში პრაქტიკული ცოდნისა და გამოცდილების მიღება, რაც მათ მომავალ საქმიანობაში გამოადგებათ", - აღნიშნა ზურა ლალაზაშვილმა.
თანამშრომლობის მემორანდუმი ძალაში გაფორმებისთანავე შევიდა, ხოლო მისი მოქმედების ვადა სამი წლის ვადით განისაზღვრა.
