„რას ალ ხაიმა ინვესტმენტ აუტორიტი" (RAKIA), უზრუნველყოფს რა თავისუფალ ინდუსტრიულ ზონებში მიმზიდველ საინვესტიციო გარემოს, ხელს უწყობს სამრეწველო პარკების და ოფშორული ობიექტების განვითარებას. თავად "რაკია საქართველოს ფოთის თავისუფალ ინდუსტრიულ ზონას" 2008 წლიდან დღემდე ფოთის პროექტში 40 მლნ აშშ დოლარზე მეტი ინვესტიცია აქვს ჩადებული.
ბოლო წლებში რას ალ ხაიმას საემირო ტურისტების, ინვესტორებისა და მრეწველებისათვის ძალზედ მიმზიდველი გახდა. 2015 წელს კი „რაკია" დაასრულებს სპორტის ისტორიაში უმნიშვნელოვანეს პროექტს, რომელიც თემატურად მიეძღვნება ევროპის ცხრაგზის ჩემპიონს, ესპანურ სამეფო კლუბს „რეალ მადრიდს". ფეხბურთის კლუბის პარკი გაშენდება ალ მარჯანის ხელოვნურ კუნძულებზე და მისი მშენებლობა 1 მილიარდი დოლარი ეღირება.
„რეალ მადრიდის კუნძული-კურორტი" ითვალისწინებს 12 ჰექტარზე გაშენებულ თემატურ პარკს, 10 ათას ადგილიან ნახევარმთვარის ფორმის სტადიონს ზღვის ხედით, „რეალის" მუზეუმს, იახტ-კლუბს, ვილებსა და ბუნგალოებს, ფეშენებელურ საცხოვრებელსა და ხუთვარსკვლავიან სასტუმრო კომპლექსს 450 ნომრით. საფეხბურთო კლუბის მილიონობით ფანს ექნება შესაძლებლობა არა მხოლოდ დატკბეს პარკის მშვენიერებით, არამედ ეზიაროს და გახდეს მისი საყვარელი კლუბის ლეგენდარული ისტორიის ნაწილი.
პროექტის პრეზენტაცია გასულ კვირას, რეალ მადრიდის ბარნაბეუს სტადიონზე წარადგინეს კლუბის პრეზიდენტმა ფიორენტინო პერესმა და რას ალ ხაიმას მთავრობის წარმომადგენელმა, „რაკ ინვესტმენტ აუტორიტის" სამეთვალყურეო საბჭოს თავმჯდომარემ დოქტორ ხატერ მასადმა. აღსანიშნავია, რომ ხატერ მასადი საქართველოში ინვესტიციის სწორად ორგანიზებისათვის და წარმატებული ბიზნეს საქმიანობისთვის ბრწყინვალების საპრეზიდენტო ორდენის ჯილდოს მფლობელია.