საქართველოში საერთაშორისო სავალუტო ფონდის მიერ ახალი პროგრამის დაწყებას ფინანსთა მინისტრი დადებითად აფასებს. როგორც დიმიტრი გვინდაძემ განაცხადა, მთავრობა პროგრამის ფარგლებში გამოყოფილი ფულადი დახმარების დახარჯვას არ აპირებს, რადგანაც მთავრობას ამ ფინანსების გამოყენების საჭიროება არ უდგას.
"ჩვენთვის ეს თანხა ხელმისაწვდომი იქნება დაახლოებით 387 მლნ დოლარის ოდენობით. ჩვენ ამ თანხას არ დავხარჯავთ, რადგანაც ამ თანხის დახარჯვის საჭიროება არ გვაქვს. საბიუჯეტო შემოსავლების სახით ბიუჯეტში თანხა გვაქვს და თუ საჭირო გახდება ბიუჯეტიდან დავხარჯავთ. რაც შეეხება წინა პროგრამას, რომელიც 2008 წლის შემოდგომით დაიწყო, პრინციპში წარმატებით დასრულდა. პრაქტიკულად ფისკალური და ფულად-საკრედიტო პარამეტრები არის შესრულებული. ცალსახად დადებითი პროგრამა იყო და ეხლა სსფ-სთან დამატებით, 2 წლიან პროგრამას ვიწყებთ, რომელიც უზრუნველყოფს დიალოგს ჩვენსა და სსფ-ს შორის. ანუ ეს არის ჩარჩო, რომელის ფარგლებშიც ჩვენს შორის დიალოგი წარიმართება", - განაცხადა ფინანსთა მინისტრმა.
როგორც ცნობილია საქართველოს მთავრობამ და საერთაშორისო სავალუტო ფონდმა (სსფ), საქართველოსთვის 24-თვიანი, 250 მლნ SDR-ის (ამჟამინდელი კურსით 387 მლნ აშშ დოლარი) ფინანსური დახმარების პროგრამის დამტკიცების შესახებ წინასწარ შეთანხმებას მიაღწიეს.
საბოლოოდ პროგრამის დამტკიცების საკითხი ფონდის აღმასრულებელ დირექტორთა საბჭომ უნდა განიხილოს, რომელიც სხდომას 11 აპრილს გამართავს. ახალი პროგრამის პირობებით, საქართველო ტრანშების ათვისებას საჭიროების შემთხვევაში და ასევე საკუთარი მიზნების მიხედვით შეძლებს.
სსფ-ში განმარტავენ, რომ ახალი პროგრამა ლოგიკურად გააგრძელებს ეკონომიკის მხარდაჭერის 33-თვიან პროგრამას, რომელიც 2011 წლის 14 ივნისს დასრულდა და მის ფარგლებში საქართველომ 577 მლნ SDR (893 მლნ აშშ დოლარი) მიიღო.
