ენერგეტიკისა და ბუნებრივი რესურსების მინისტრის მოადგილე გიორგი ყაველაშვილი განმარტავს, რომ სექტორის განვითარებასთან ერთად ქვეყანაში დამხმარე საწარმოებიც ვითარდება,რაც ხელს შეუწყებს ქვეყნის ეკონომიკის განვთარებას.

"ჩვენ იმდენად ძლიერები ვართ, რამდენადაც ძლიერია ჩვენი ეკონომიკა. ცნობილია, რომ სახელმწიფოში მიმდინარეობს 15 ახალი ჰესის მშენებლობა. ენერგეტიკის სექტორის აქტიობებმა განაპირობა ის, რომ ქვეყანაში შეიქმნა დამხმარე საწარმოები, რომელიც ჰესებისათვის საჭირო პროდუქციას აწარმოებენ. ამ დარგში შექმნილმა მდგომარეობამ განაპირობა, რომ ისეთი ბიზნესი, რაც პირდაპირ უკავშირდება ამ მშენებლობას, განვითარებულიყო და დღეს ამის ნათელი მაგალითია საქკაბელი, რომელიც იქმნება და ანაცვლებს იმპორტს, საქკაბელის არსებობა არის ნამდვილად მყარად დადებული აგური ჩვენი ქვეყნის სტაბილურობისა და შემდგომი განვითარებისათვის"
შეგახსენებთ, რომ „საქკაბელი" 1959 წელს დაარსდა.
წარმოების რეაბილიტაცია ახალი მენეჯმენტის მიერ 2006 წლიდან დაიწყო და დღეს 74 ტიპის დასახელების 2000-ზე მეტი დასახელების ასორტიმენტს აწარმოებს.

2006-2007 წლებში ქარხანაში 3 მილიონი დოლარის ინვესტიცია განხორციელდა.

2007-2011 წლებში ქართული პროდუქციით რუსული და სხვა იმპორტული პროდუქციის ჩანაცვლება განხორციელდა: მოხდა საქართველოს ქალაქებისა და სოფლების გამრიცხველიანება, შეიცვალა გარე განათების სისტემა საქართველოს მსხვილ ქალაქებში, განხორციელდა საქართველოს რკინიგზისთვის სასიცოცხლოდ აუცილებელი სპეციფიკური კაბელების წარმოება, განხორციელდა ექსპორტი სომხეთის რესპუბლიკაში.
საწარმოში დასაქმებულია 200 თანამშრომელი, რომელთა საშუალო ხელფასი 600 ლარს აღემატება.