როგორც საერთაშორისო სავალუტო ფონდის მისიის ხელმძღვანელმა საქართველოში და უფროსმა მუდმივმა წარმომადგენელმა, ედუარდ გარდნერმა დღეს განაცხადა, ფონდსა და საქართველოს მთავრობას შორის მიღწეულია შეთანხმება 24-თვიანი ახალი პროგრამის დაწყების შესახებ. პროგრამა საქართველოსთვის 387 000 000 დოლარის მხარდამჭერი საკრედიტო ხაზისა და საკრედიტო მექანიზმების გამოყოფას გულისხმობს. მისივე განმარტებით, თანხა მოხმარდება ხელისუფლების ეკომონიკურ და საფინანსო პროგრამას 2012-2013 წლებში. შეთანხმება 11 აპრილს დასამტკიცებლად წარედგინება საერთაშორისო სავალუტო ფონდის აღმასრულებელ დირექტორთა საბჭოს.

პროგრამის ფარგლებში გამოყოფილ თანხას ხელისუფლება გამოიყენებს მაშინ, როდესაც ამას ჩათვლის საჭიროდ.

პროგრამა 33-თვიანი ეკონომიკის მხარდამჭერი პროექტის გაგრძელებაა, რომელიც გასული წლის 14 ივნისს დასრულდა. 2011 წელს, ქვეყნის მხარდამჭერი ეკონომიკური პროგრამის ფარგლებში, დაახლოებით 893 მილიონი ამერიკული დოლარის ათვისება მოხდა.

"არსებული რისკების მიუხედავად, 2012 წლისთვის საქართველოს პერსპექტივა საიმედოა, ეკონომიკური ზრდის პროგნოზი 6%-ია, ინფლაცია მოსალოდნელია დაბალ მაჩვენებელზე, საგარეო ეკონიმიკური და ფინანსური სიტუაციის გაუარესების შემთხვევაშიც კი, საქართველო შეძლებს პროგრამით გათვალისწინებული თანხის გამოყენებას", - აცხადებს გარდნერი.

გარდნერის განმარტებით, ეს პროგრამა ლოგიკურად ებმის 33-თვიან ეკონომიკის მხარდამჭერ პროგრამას, რომელიც 2011 წლის 14 ივნისს დასრულდა. წინა პროგრამის ფარგლებში საქართველომ საერთაშორისო სავალუტო ფონდისგან 893 მილიონი დოლარი აითვისა.

სსფ-ის მისიის ხელმძღვანელის განცხადებით, ახალი პროგრამის მიზანია, ფისკალური რეზერვების გაზრდა, ბალანსის გაუმჯობესება, ბაზრის რწმენის აღდგენა და ქვეყნისთვის სხვადასხვა წყაროებიდან ფინანსური რესურსის მოზიდვაში კატალიზატორის როლის შერსულება. გარდნერის განცხადებით, საქართველოსთვის საშუალოვადიან გამოწვევად რჩება საგადამხდელო ბალანსისა და უმუშევრობის შემცირება.