დღეს, 28 მარტს, 10:00 საათზე, ფინანსთა სამინისტროში საქართველოსა და მსოფლიო ბანკს შორის "რეგიონული განვითარების პროექტის" სასესხო ხელშეკრულება გაფორმდება.
ხელშეკრულებას ხელს მოაწერენ საქართველოს მხრიდან ფინანსთა მინისტრი დიმიტრი გვინდაძე, მსოფლიო ბანკის მხრიდან - სამხრეთ კავკასიის რეგიონული დირექტორი ასად ალამი. ხელმოწერის ცერემონიას დაესწრებიან რეგიონული განვითარებისა და ინფრასტრუქტურის მინისტრი რამაზ ნიკოლაიშვილი და კულტურული მემკვიდრეობის დაცვის ეროვნული სააგენტოს ხელმძღვანელი ნიკოლოზ ვაჩეიშვილი.
ხელშეკრულება ითვალისწინებს გრძელვადიანი და შეღავათიანი პირობებით ფინანსური რესურსის გამოყოფას 60 მილიონი აშშ დოლარის ოდენობით. პროექტი ითვალისწინებს კახეთის რეგიონის კომპლექსურ რეაბილიტაციას და განვითარებას, რეგიონში შერჩეული კულტურული მემკვიდრეობის ძეგლებისთვის სარესტავრაციო სამუშაოს ჩატარებას, კერძო ინვესტიციების ხელშეწყობას.