საპარლამენტო უმრავლესობის ლიდერი პეტრე ცისკარიშვილი სტუდენტების პოლიტიკური ნიშნით შერჩევას აბსურდულს უწოდებს.
ამის შესახებ ცისკარიშვილმა პარლამენტის დღევანდელ პლენარულს სხდომაზე "ქართული დასის" ლიდერის ჯონდი ბაღათურიას საპასუხოდ განაცხადა, რომელმაც ხელისუფლება სტუდენტთა დასაქმების პროგრამაში მხოლოდ ლოიალური სტუდენტების ჩართვაში დაადანაშაულა.
ცისკარიშვილის განცხადებით, 65 ათასმა სტუდენტმა შეავსო ანკეტა და სამწუხაროდ მათგან ყველა ვერ დასაქმდება, რადგან ამის რესურსი არ არის.
რაც შეეხება მათი პოლიტიკური ლოიალობის ნიშნით შერჩევას, ცისკარიშვილი ამას აბსურდულ ბრალდებად მიიჩნევს და ამბობს, რომ ისინი ჩაერთვებიან დასაქმების პროგრამაში, ვინც უფრო მაღალკვალიფიციური იყო და ვინც პირველმა შეავსო ანკეტა.
"თქვენ მაგალითზე იხილეთ, რამდენი ხანია ანკეტა შევსებული გაქვთ, ამ ტრიბუნიდან გამოდიხართ და მაინც ვერ დასაქმდით შუშის სასახლეში. ზოგიერთმა სტუდენტმაც, სამწუხაროდ, იგივე ბედი გაიზიარა,, - დასძინა ცისკარიშვილმა.
ჯონდი ბაღათურიას მტკიცებით, სტუდენტებს რეკომენდაციები ადგილობრივმა თვითმმართველობებმა გაუწიეს და ქვეყანაში 102 000 სტუდენტიდან მხოლოდ 25 000 სტუდენტის დასაქმებაზე მიიღეს გადაწყვეტილება.
