სს „თელასის" აქციონერთა კრების გადაწყვეტილებით კომპანიის საწესდებო კაპიტალი დამატებითი ჩვეულებრივი აქციების განთავსების გზით გაიზრდება. სულ განთავსდება 31 მლნ 281ათას 532 ცალი დაამატებითი აქცია, რომელთა ნომინალური ღირებულება 1 ლარს შეადგენს. აღნიშნული აქციების განთავსების შემდეგ „თელასის" საწესდებო კაპიტალი 112 მლნ 429 ათას 418 ლარს შეადგენს.
ემიტირებული აქციების 75,001% (23 მლნ. 461 ათას 356 ცალი ჩვეულებრივი აქცია) გადაეცემა კომპანია Silk Road Holding B.V. -ს („ინტერ რაო ეეს"-ის სტრუქტურა) 44 მლნ. 133 ათას 198 ლარად, რომელიც აუდიტორულმა კომპანიამ ERNST&YOUNG განსაზღვრა. აქციათა ღირებულების გადახდა განხორციელდება სს „ თელასის" საწესდებო კაპიტალში Silk Road Holding B.V. -ს სს „თელასის" მიმართ 44 მლნ 133 ათას 198 ლარის ოდენობის მოთხოვნის უფლების გადაცემით, იმ პირობით რომ მოთხოვნის ასეთი უფლება შეწყდება სრულიად. აღნიშნული დავალიანება წარმოიშვა Silk Road Holding B.V. -ს მიერ „თელასის" ელექტროქსელის მოდერნიზებაში განხორციელებული ინვესტიციის შედეგად.
აგრეთვე, ემიტირებული აქციების 24,529% (7 მლნ 673 ათას 054 ჩვეულებრივი აქცია) გადაეცემა საქართველოს სახელმწიფოს 7 მლნ 673 ათას 054 ლარად, რომელიც აუდიტორულმა კომპანიამ ERNST&YOUNG განსაზღვრა. მათი ღირებულების გადახდა განხორციელდება იმ პირობით, რომ საქართველოს სახელმწიფოს მოთხოვნის უფლება შპს „მტკვარი ენერგეტიკას" (შედის ინტერრაო ეეს-ის შემადგენლობაში) მიმართ „ინსტიტუციონალურ ვალებთან" დაკავშირებით გადაეცემა „თელასის" საწესდებო კაპიტალში. ამასთან ერთად, საქართველოს სახელმწიფოს მოთხოვნის უფლება შპს „მტკვარი ენერგეტიკის" მიმართ „ინსტიტუციონალურ ვალებთან" დაკავშირებით შეწყდება სრულიად. აღნიშნული დავალიანება წარმოიშვა თბილისის თბოელექტროსადგურის ენერგობლოკების პრივატიზებამდე საქართველოს სახელმწიფოს მიერ აღნიშნულ ენერგოსტრუქტურის მოდერნიზებისთვის განხორციელებული ინვესტიციების შედეგად .
გარდა ამისა, 147 ათას 122 ცალი ჩვეულებრივი აქცია შესაძლოა გამოსყიდულ იქნას საზოგადოების მინორიტარულ აქციონერთა მიერ ნომინალური ღირებულებით მათი წილობრივი მონაწილეობის პროპორციულად.
„თელასის" აქციონერთა კრების გადაწყვეტილების თანახმად გენერალურ დირექტორს და სამეთვალყურეო საბჭოს თავმჯდომარეს დაევალად შეიმუშაონ და საქართველოს ეროვნულ ბანკს დასამტკიცებლად წარუდგინონ დამატებითი აქციების განთავსების ემისიის პროექტი, რის შემდეგაც ხელი მოეწერება შესაბამის შეთანხმებებს აქციების ყიდვა-გაყიდვის შესახებ.
„თელასის" დამატებითი ჩვეულებრივი აქციების განთავსების გზით საწესდებო კაპიტალის გაზრდის შემდეგ Silk Road Holding B.V. -ს და საქართველოს სახელმწიფოს წილი კომპანიაში არ შეიცვლება.
*** 1998 წლის დეკემბერში საქართველოს მთავრობასა და კომპანია „AES-Silk Road Holding B.V." -ს შორის ხელი მოეწერა ხელშეკრულებას სს „თელასის" აქციათა 75% -ის პრივატიზების შესახებ. 2003 წელს Silk Road Holding B.V. -ს აქციები შეიძინა ღია სააქციო საზოგადოებამ „ინტერ რაო ეეს"-მა .
სს „თელასი" ერთ-ერთი მსხვილი კომპანიაა საქართველოში ელექტროენერგიის დისტრიბუციის დარგში, რომელიც ახორციელებს ელექტროენერგიის განაწილებას თბილისში. კომპანია ელექტროენერგიას აწვდის 450 ათასზე მეტ მომხმარებელს. 2003 წლის აგვისტოში კომპანია „ინტერრაო ეეს"-ის შემადგენლობაში შევიდა. „ინტერრაო ეეს" მფლობელობაშია „თელასის" აქციათა 75%, ხოლო 25%-მდე სახელმწიფოს საკუთრებაა.