კიდევ ერთი თურქული საწარმო საქართველოში ტექსტილის წარმოებას ხსნის. ამ გადაწყვეტილების შესახებ ცნობილი ვერა ქობალიას თურქეთის ექსპორტიორთა ასამბლეის წარმომადგენლებთან შეხვედრისას გახდა, რომელიც რამდენიმე დღის უკან გაიმართა. თურქი ბიზნესმენი უახლოეს პერიოდში გეგმავს საქართველოში ჩამოსვლას. მისი წარმოების გახსნით კი რამდენიმე ათეული ახალი სამუშაო ადგილი შეიქმნება.
ტექსტილი, ტურიზმი, მშენებლობა, სოფლის მეურნეობა, ენერგეტიკა და მძიმე მრეწველობა - ეს არის მცირე ჩამონათვალი იმ სექტორებისა, რომელთა მიმართაც თურქეთის ექსპორტიორებს ჰქონდათ ინტერესი. მათ შეკითხვებს საქართველოს ეკონომიკისა და მდგრადი განვითარების მინისტრი პასუხობდა, რომელიც თურქეთში სამუშაო ვიზიტით იმყოფება.
თურქეთი, რომელიც მსოფლიოს ერთერთი ყველა სწრაფად განვითარებადი ეკონომიკის მქონე ქვეყანაა, აქტიურად ეძებს პატრნიორებს მეზობელ სახელმწიფოებში ინვესტიციების დასაბანდებლად. საქართველო ამ კუთხით ძალიან მიმზიდველია - ქვეყანა მსოფლიოში ერთერთი საუკეთესოა ბიზნესის დაწყებისა და განვითარების სიმარტივით, აქვს ხელსაყრელი სავაჭრო შეთანახმებები მსოფლიოს ეკონომიკურად წამყვან სახელმწიფოებთან. არანაკლები მნიშვნელობა აქვს იმასაც, რომ საქართველოში არის კვალიფიციური მუშახელი, მარტივი საგადასახადო სისტემა და დაბალი ტარიფი ელექტოენერგიაზე.
თურქი ბიზნესმენების წარმომადგენლობითი ჯგუფი საქართველოში ბოლოს თებერვალში იმყოფებოდა, თუმცა როგორც ცნობილი გახდა, იგეგმება ახალი ბიზნეს- ფორუმის გამართვა. თურქეთი, რომელიც საქართველოს ნომერი პირველი სავაჭრო პარტნიორია და ერთ-ერთი ყველაზე მსხვილი ინვესტორი, მისი კომპანიების მეშვეობით საქართველოში ქმნის ათასობით სამუშაო ადგილს. ერთობლივი ქართულ-თურქული კომპანიები ზრდიან საქართველოს საექსპორტო პროდუქციას, რომელიც იმავე თურქეთში წარმატებით იყიდება. როგორც საქართველოს ეკონომიკისა და მდგრადი განვითარების მინისტრმა ვერა ქობალიამ განაცხადა, საქართველოს მთავრობის მიზანია არა მხოლოდ ახალი კომპანიების შემოყვანა თურქეთში, არამედ უკვე არსებული ბიზნესებისთვის ხელის შეწყობა და განვითარება.
ბიზნესმენთა გარდა, ორი ქვეყნის სავაჭრო-ეკონომიკურ ურთიერთობებს ორმხრივი სამთავრობო კომისიაც განიხილავს. ამჟამად მიმდინარეობს მუშაობა დღის წესრიგზე. ყველაზე მნიშვნელოვან საკითხებზე ვერა ქობალიამ თავის თურქ კოლეგასთან, ეკონომიკის მინისტრთან ზაფერ ჩაღლაიანთან განიხილა. შეხვედრაზე დადებითად შეფასდა ორი ქვეყნის ეკონომიკური თანამშრომლობა და სამომავლო ორიენტირებიც გამოვლინდა.
ორმხრივი შეხვედრის შემდეგ, ორივე მინისტრმა მოხსენება გააკეთეს თურქეთ-საქართველოს ბიზნეს-საბჭოს წევრების წინაშე. მათ საქართველოს საინვესტიციო შესაძლებლობებზე ისაუბრეს.
