ფრაქცია "ერთობა სამართლიანობისთვის,, პარლამენტში დღეს ,,უმუშევართა სოციალური დაცვის შესახებ,, კანონპროექტის ინიცირებას მოახდენს. დღეს გამართულ ბრიფინგზე, აღნიშნული კანონპროექტი, ფრაქციის თავმჯდომარე დიმიტრი ლორთქიფანიძემ, უმუშევართა დაცვის კავშირის წევრებთან ერთად წარადგინა. მისი თქმით, კანონპროექტი ითვალისწინებს ინსტიტუციონალურ მიდგომას უმთავრესი პრობლემისადმი და არა არჩევნების წინ სპონტანურ დასაქმებას.
კანონპროექტის თანახმად, პირველ რიგში უნდა განისაზღვროს უმუშევრის სტატუსი და შეიქმნას სპეციალური რეესტრი, რაც საქართველოს კონსტიტუციითაც არის გათვალისწინებული. ლორთქიფანიძის განმარტებით, კონსტიტუცია ასევე ითვალისწინებს უმუშევრად დარჩენილი მოქალაქეების საარსებო მინიმუმით უზრუნველყოფას.
კანონპროექტში გაწერილია ასევე, უმუშევართა შემწეობის ოდენობა, მათთვის სოციალური პაკეტის განსაზღვის წესები, შემწეობის შეწყვეტის პირობები, უმუშევართა პროფესიული მომზადება-გადამზადება. როგორც ავტორები აცხადებენ, მასში გამოყენებული იყო გერმანიის, საფრანგეთის, ლატვიისა და ლიტვის გამოცდილება.
ლორთქიფანიძის განცხადებით, კანონპროექტზე მუშაობა ,,უმუშევართა კავშირთან,, ერთად 7 თვე მიმდინარეობდა და მასში მონაწილეობა მიიღო ასევე, პარლამენტის კვლევითმა დეპარტამენტმა.
მისივე თქმით, აღნიშნულ კანონპროექტთან დაკავშირებით პირადად ესაუბრა ჯანდაცვის ახლად დანიშნულ მინისტრს ზურაბ ჭიაბერაშვილს, რომელმაც საკითხისადმი დიდი იმტერესი გამოხატა.
ლორთქიფანიძე იმედოვნებს, რომ მინისტრი პირობას შესრულებს და კანონპროექტის ინიცირება, შესაბამის შედეგს გამოიღებს.
ფრაქცია ,,ერთობა სამართლიანობისთვის,, ,,უმუშევართა სოციალური დაცვის შესახებ,, კანონპროექტთან ერთად, დღეს ,,სისხლის სამართლის კოდექსში,, ცვლილებების შესახებ, კანონპროექტის ინიცირებასაც მოახდენს.
