"თავისუფალი დემოკრატები" დასავლეთ საქართველოში შეიარაღებულ დაჯგუფებებთან დაკავშირებით ირაკლი ალასანიას მიმართვაზე უშიშროების საბჭოს რეაგირებას გამოეხმაურნენ . "თავისუფალი დემოკრატების" განცხადებას გთავაზობთ უცვლელად:
"გასული წლების მძიმე გამოცდილებამ, კერძოდ, მოსახლეობის დარბევისა და დაშინებისთვის არაფორმალური ე.წ. „ზონდერ ჯგუფების" გამოყენებამ ხელისუფლების რეალური სახე წარმოაჩინა. იმ პერიოდში და მას შემდეგაც არაერთი კადრი გავრცელდა იმისა, თუ როგორ უსწორდებიან სამოქალაქო ტანსაცმელში ჩაცმული შეიარაღებული პირები ოპოზიციურად განწყობილ ჩვენს თანამოქალაქეებს. მსგავსი ტიპის შეიარაღებული დაჯგუფებების აქტიურობა ფიქსირდებოდა მას შემდეგ ჩატარებულ ყველა არჩევნებზე. სამწუხაროდ, ასეთი თემების წინ წამოწევა და განხილვა ხდებოდა პოსტფაქტუმ, მაგრამ როგორც წესი, კონკრეტული დამნაშავეების გამოვლენით და დასჯით არასდროს დასრულებულა.
სწორედ ამის გამო და იმის გათვალისიწნებით, რომ დროულად იქნეს აღკვეთილი მსგავსი უკანონობა და მოხდეს დაძაბულობის პრევენცია, ირაკლი ალასანიამ, უკანასკნელი თვეების მანძილზე სამეგრელოს რეგიონიდან მოწოდებული და გადამოწმებული შეტყობინებების საფუძველზე ეროვნული უშიშროების საბჭოს რეაგირებისთვის გადასცა ინფორმაცია ზუგდიდში არაფორმალური შეიარღებული ჯგუფების ფორმირების შესახებ, რომელშიც დასახელებული იყო ასეთი დაჯგუფებების დისლოკაციის ადგილი და მათი წევრების ჩამონათვალი.
უშიშროების საბჭომ გამოაქვეყნა ეს ინფორმაცია, ხოლო საბჭოს მდივანმა გიგა ბოკერიამ დაადასტურა, რომ ამ სიაში ჩამოთვლილი პირები თავდაცვისა და შინაგან საქმეთა სამინისტროს თანამშრომლები ან რეზერვისტები არიან, რითაც გ.ბოკერიამ ასევე დაადუსტრა, რომ ზემოაღნიშნულ სიაში ჩამოთვლილი არაფორმალური ფორმირებების წევრები, რომელთაგან ზოგიერთი სავარაუდოდ კრიმინალური წარსულის მქონე ელემენტიცაა, ასევე წარმოადგენენ სახელისუფლებო სტრუქტურებს.
ის ფაქტი, რომ ხელისუფლებამ ირაკლი ალასანიას განცხადებების შემდეგ დაიწყო რეზერვისტების შესახებ საკანონმდებლო ცვლილებების შემუშავება და საკუთარ ინტერესებზე მორგება და ნებაყოფლობითი რეზერვის ერთ-ერთ მთავარ ამოცანად დაასახელა სწორედ კრიზისულ სიტუაციებში სამოქალაქო ხელისუფლების დახმარება, კიდევ უფრო მეტად აძლიერებს ჩვენს ვარაუდს ხელისუფლების გეგმების შესახებ.
ამასთან, საზოგადოებისთვის ცნობილი რამდენიმე დამნაშავის რეზერვის ნაწილად გამოცხადება და მათი კერძო სახლებში შეიარაღებით განთავსება, ხელისუფლების მხრიდან მორიგ უკანონობაზე მეტყველებს.მაგალითად, მოქმედი კანონმდებლობა კრძალავს რეზერვში მძიმე და განსაკუთრებით მძიმე დანაშაულისათვის მსჯავრდებული პირის გაწვევას.
დასასრულს გვინდა ცალსახად აღვნიშნოთ, რომ ჩვენი მხარდაჭერა პატიოსანი და პატრიოტი სამხედროების და პოლიციელების მიმართ ურყევია და გ.ბოკერიას მცდელობა, დააპირისპიროს ისინი საზოგადოებასთან, განწირულია წარუმატებლობისთვის. კიდევ ერთხელ მოვუწოდებთ მას ზედმიწევნით შეასრულოს მისთვის დაკისრებული ფუნქციები ქვეყნის უსაფრთხოების უზრუნველყოფის საქმეში".