საქართველოში ამერიკის შეერთებული შტატების საელჩო და ელჩი ჯონ ბასი აშშ-სა და საქართველოს შორის დიპლომატიური ურთიერთობების დამყარების 20 წლის ეხმიანებიან.
განცხადების ტექსტს, რომელიც აშშ-ის საელჩოს ვებგვერდზე გამოქვეყნდა "ჯი-ეიჩ-ენი"უცვლელად გთავაზობთ:
1992 წლის 24 მარტს აშშ-მა და საქართველომ დიპლომატიური ურთიერთობები დაამყარეს. დღეს ჩვენი ქვეყნები პარტნიორობის 20 წლისთავს აღნიშნავენ. განვლილი ღირშესანიშნავი 20 წლის განმავლობაში ჩვენს თვალწინ საქართველო ახლად ფეხადგმული დამოუკიდებელი სახელმწიფოდან მსოფლიო უსაფრთხოების განმტკიცების საქმეში გლობალურ კონტრიბუტორად და რეგიონში ყველაზე წარმატებული რეფორმების ექსპორტიორ ქვეყნად იქცა. როგორც პრეზიდენტმა ობამამ თქვა, „საქართველომ უნდა იამაყოს იმ პროგრესით, რომელსაც სუვერენული და დემოკრატიული სახელმწიფოს მშენებლობაში მიაღწია." ელჩი ბასის სიტყვით, „ამერიკელები ამაყნი ვართ იმ მოკრძალებული წვლილით, რომელიც ჩვენმა ხალხმა საქართველოს განვითარების საქმეში შეიტანა."
განვლილი ოცი წლის განმავლობაში აშშ-ის მშვიდობის კორპუსის ასობით მოხალისემ იმსახურა საქართველოში. აშშ-ის მთავრობის მიერ დაფინანსებული პროგრამებით 5,000-ზე მეტმა ქართველმა სტუდენტმა განათლება შეერთებულ შტატებში მიიღო. 20 წლის განმავლობაში, აშშ-მა საქართველოს 3 მილიარდი დოლარის ოდენობის დახმარება აღმოუჩინა. ამავე პერიოდში საგრძნობლად გაიზარდა ორმხრივი ვაჭრობა: მხოლოდ უკანასკნელ ათწლეულში, აშშ-სა და საქართველოს შორის სავაჭრო ბრუნვამ 2.2 მილიარდ დოლარს გადააჭარბა. აშშ განუზომლად მადლიერია საერთაშორისო უსაფრთხოების მხარდაჭერის ოპერაციაში საქართველოს მონაწილეობისათვის. აშშ მადლიერია ქართველი ჯარისკაცებისა და მათი ოჯახების მიერ გაღებული მსხვერპლისათვის, იმ ქართველი ჯარისკაცების, რომლებიც ამერიკელი სამხედროების მხარდამხარ ავღანეთის ყველაზე სახიფათო კუთხეში მსახურობენ.
ელჩი ბასი: „დღეს ვსვამთ თქვენი, ქართველი მეომრების სადღეგრძელოს თქვენი ღვაწლის დასაფასებლად და ვსვამთ ჩვენი მეგობრობისა და ურთიერთობის სადღეგრძელოს. მომდევნო ოცი წლის განმავლობაში ჩვენი ურთიერთობა კიდევ უფრო გაძლიერდება და გაღრმავდება. საქართველოსა დ ამერიკის მეგობრობას გაუმარჯოს!"
მასალის გამოყენების პირობები