სოფლის მეურნეობის მინისტრი ზაზა გოროზია "ქორთიარდ მარიოტში" ღვინისა და ალკოჰოლური სასმელების მწარმოებელ 45 კომპანიის და "ასოციაცია ქართული ღვინის" წარმომადგენლებს შეხვდა.
შეხვედრაზე დარგში არსებულ პრობლემებზე და მათი მოგვარების გზებზე ისაუბრეს. განიხილეს ახალი საექსპორტო ბაზრები. კიდევ ერთხელ შეაჯამეს ქართული ღვინისა და ალკოჰოლური სასმელების ექსპორტი, იმსჯელეს მეღვინეობის სექტორის განვითარებისა და ადგილობრივი ღვინის პოპულარიზაციისთვის საჭირო ღონისძიების შესახებ.
"უკანასკნელ პერიოდში ღვინის ექსპორტის მნიშვნელოვანი ზრდა შეინიშნება; კერძოდ, წლევანდელმა მონაცემებმა გასული წლის მაჩვენებელს 25%-ით გადაჭარბა. თუმცა პოტენციალი ბევრად მეტია. მეღვინეებთან მსგავსი ტიპის შეხვედრები კვლავ გაიმართება. ხშირი კომუნაკაცია და ინფორმაციის გაცვლა ხელს შეუწყობს ექსპორტის კიდევ უფრო მეტად წახალისებას და ზრდას", - განაცხადა მინისტრმა ჟურნალისტებთან საუბრისას.
გოროზიამ მეღვინეებს მიმდინარე წელს სოფლის მეურნეობის სამინისტროს მიერ ამ სექტორში დაგეგმილი პროექტები გააცნო.
