რუსეთის მიერ ოკუპირებულ ცხინვალის რეგიონში აქტიურად ვრცელდება ინფორმაცია იმის შესახებ, რომ თითქოს ვლადიკავკაზის ქარხანა "ელექტროცინკის" ყოფილი დირექტორი პაველ ავდეევი ცხინვალის რეგიონის ტერიტორიაზე დამუშავებული ბირთვული მასალების სამარხის გაკეთებას აპირებს.
აღნიშნული ინფორმაციის შესახებ ტელეარხ "პიკთან" საუბრისას ექსპერტი კავკასიია საკითხებში მამუკა არეშიძე აცხადებს, რომ სწორედ აღნიშნული ფაქტი გახდა საქართველო-რუსეთის სახელმწიფო საზღვრის ე.წ. სამხრეთოსურ მონაკვეთზე საკონტროლო პუნქტების გაუქმების მიზეზი. არეშიძე ამტკიცებს, რომ მოსკოვის განხრაზვაა ცხინვალის რეგიონი ბირთვულ სანაგვედ გადააქციოს, რაც ადგილობრივ მოსახლეობას საფრთხეს უქმნის.
აღსანიშნავია, რომ ე.წ. სამხრეთ ოსეთის ე.წ. პრეზიდენტის მოვალეობის შემსრულებელმა ვადიმ ბროვცევმა რამდენიმე ხნის წინ პაველ ავდეევი ე.წ. სამხრეთ ოსეთის განვითარების პროგრამირებისა და ანალიზის საკითხებში ე.წ. სახელმწიფო მრჩევლად დანიშნა.
2011 წლის თებერვლამდე ავდეევი ვლადიკავკაზის ქარხანა "ელექტროცინკის" დირექტორად მუშაობდა. ეს ქარხანა - რუსეთის ფერადი მეტალურგიის ერთ-ერთი ყველაზე მსხვილი დაწესებულებაა. ქარხნის ისტორია 100 წელზე მეტს ითვლის.
აღსანიშნავია ასევე, რომ ე.წ. სამხრეთ ოსეთის ბუნებრივი რესურსების დაცვის "კომიტეტში" უარყოფენ ცხინვალის რეგიონში ბოლო დროს გავრცელებულ ამ ინფორმაციას. თუმცა ასევე არის ვერსია იმის შესახებ, რომ ამგვარი სამარხები უკვე შექმნილია კვაისის მაღაროებში.
"ეს მოარული ხმები უსაფუძვლოა, ისინი სპეციალურად ვრცელდება იმისათვის, რომ საზოგადოებრივი აზრი შეაშფოთონ. ამისი არავითარი საფუძველი არ არსებობს. ჩვენი კომიტეტის თანხმობის გარეშე ასეთი ქმედებების განხორციელება შეუძლებელია. ამიტომაც ყველას ვარწმუნებ, რომ შეშფოთების საგანი არ არსებობს", _ აცხადებს ე.წ. სამხრეთ ოსეთის ბუნებრივი რესურსების დაცვის "კომიტეტის" ხელმძღვანელი ბალა ბესტაუთი.
