"ნაცვლად იმისა, დახვეწონ არსებული სისტემა, პირიქით, ნებაყოფლობითი რეზერვისტების სახელით, მოსახლეობის შეიარაღება პოლიტიკური ნიშნით ხდება", _ განაცხადა "ჯი-ეიჩ-ენთან" საუბარში ცისკარიშვილმა.

ცისკარიშვილი ხელისუფლების მხრიდან რეზერვისტთა ჯგუფების შექმნის საჭიროებას ვერ ხედავს.

"რეზერვისტების ინსტიტუტი უკვე კარგა ხანია, 2008 წლიდან მოყოლებული არსებობს და ვნახეთ, რა დღეში ჩააგდეს. ნაცვლად იმისა, რომ დახვეწონ არსებული სისტემა, პირიქით, ნებაყოფლობითი რეზერვისტების სახელით, ხდება მოსახლეობის შეიარაღება პოლიტიკური ნიშნით. გინდა რეზერვისტები დაუძახეთ, გინდა ანტიტერორისტული ჯგუფები, რაც გინდა დაუძახეთ, ოღონდ რა აუცილებლობა იყო და რატომ ხდება მათი შექმნა... ვის უნდა ვებრძოლოთ, თურქეთს? - წავაგებთ, ირანს? - წავაგებთ. აზერბაიჯანს? - წავაგებთ", _ განაცხადა "ჯი-ეიჩენთან" საუბარში ცისკარიშვილმა.

შეგახსენებთ, "თავისუფალი დემოკრატების" ლიდერმა ირაკლი ალასანიამ დასავლეთ საქართველოში, კერძოდ, სამეგრელოში, სამხედრო ფორმირებების შექმნის შესახებ ინფორმაცია გაავრცელა. მისი თქმით, არსებობს საფუძვლიანი ეჭვი, რომ სამხედრო ფორმირებები განსხვავებული პოლიტიკური შეხედულების მქონე ადამიანების დაშინებისთვის იქმნება.

"არსებობს საფუძვლიანი ეჭვი: ეს ფორმირებები იმიტომ იქმნება, რომ განსხვავებულად მოაზროვნე პოლიტიკოსების, მათი მხარდამჭერებისა და მომხრეების დევნა და დაშინება დაიწყოს და საჭიროების შემთხვევაში მათი ფიზიკური განადგურება მოხდეს", _ განაცხადა ალასანიამ.