საგარეჯოს რაიონის სოფელ იორმუღანლოში 5 ათასი ჰექტარი სახნავ - სათესი ირანელმა ბიზნესმენმა რაშიდ მანეშმა იყიდა. ამის შესახებ კახეთის საინფორმაციო ცენტრს საგარეჯოს მუნიციპალიტეტის გამგებელმა გია ჩალათაშვილმა განუცხადა.
„ხალხისთვის მიწა არავის გაუყიდია. ეს იყო სახელმწიფო საკუთრებაში არსებული მიწები და სახელმწიფომ გაყიდა. არსებული 10 000 ჰექტარიდან 5 000 ჰექტარი ირანელმა ბიზნესმენმა რაშიდ მანეშმა 6 მილიონ ლარად იყიდა. დარჩენილი 5 ათასი ჰექტარით, ვიდრე გაიყიდება, მოსახლეობას შეუძლია ისარგებლოს", - აღნიშნა გია ჩალათაშვილმა.
მისივე თქმით, იორმუღანლოს მაცხოვრებლებს საქართველოს პრეზიდენტი იმ მიწებს აჩუქებს, რომლებიც მათ ივრისჭალებში ფაქტობრივ მფლობელობაში აქვთ.
შეგახსენებთ, რომ იორმუღანლოში მცხოვრები 200-მდე ეთნიკური აზერბაიჯანელი, დღეს, სოფელში ნოვრუზობის მისალოცად ჩასულ „ქართული ოცნების" ლიდერებს შეხვდა. შეხვედრის დროს ადგილობრივებმა აღნიშნეს, რომ საქართველოს მთავრობამ ის მიწები გაყიდა, რომელსაც წლების განმავლობაში ისინი იჯარით ფლობდნენ, ამუშავებდნენ და თავს ირჩენდნენ. მიწის ახალმა მფლობელმა ამოსული ქერი და ხორბალი გადახნა
