დღეს, 21 მარტს, 19:00 საათზე, სასტუმრო "რადისონ ბლუ ივერიაში" კომპანია "საქკაბელი" ახალი პროდუქციის გამოშვებისა და იმპორტის ჩანაცვლების პროგრამის წარმატებულად განხორციელების პრეზენტაციას გამართავს.
ღონისძიების ფარგლებში წარმოდგენილი იქნება საცალო ქსელის გაფართოების, 4 ახალი მაღაზიისა და 150 ახალი სადილერო ადგილის შექმნის გეგმა. კომპანიის პრეზენტაციას ენერგეტიკისა და ეკონომიკის სამინისტროების ხელმძღვანელები, 200-ზე მეტი კერძო კომპანიის წარმომადგენელი დაესწრება. ღონისძიებაზე "საქკაბელს" გერმანული სააკრედიტაციო კომპანია "ტუვ"-ი ხარისხის მართვის ISO 9001:2000 სერტიფიკატს გადაცემს.
"2012 წელი კომპანიამ რეპოზიციონირებით დაიწყო და რებრენდინგი განახორციელა. ბრენდის ახალი საიდენტიფიკაციო ატრიბუტიკა ბიზნესორიენტაციასა და წლების განმავლობაში დაგროვილ გამოცდილებას აერთიანებს, რომლის მეშვეობითაც კომპანიამ ბაზარზე ლიდერის პოზიციის დამკვიდრება შეძლო. ჩვენ შევეცადეთ დაგვემსხვრია გავრცელებული სტერეოტიპი "უცხოური კარგია" და შემოგვეტანა ახალი - "ჩვენც შეგვძლებია". საქკაბელის პროდუქცია დამზადებულია საქართველოში. ეს ჩვენ გვეამაყება და განსაკუთრებულ პასუხისმგებლობას გვანიჭებს", - განაცხადა კომპანიის მმართველმა პარტნიორმა ედიშერ მამალაძემ.
მიმდინარე წელს "საქკაბელი" საექსპორტო პროდუქციის მოცულობის ზრდასა და ექსპორტის გეოგრაფიული არეალის გაფართოებას გეგმავს.
შეგახსენებთ, რომ "საქკაბელი" 1959 წელს დაარსდა. წარმოების რეაბილიტაცია ახალი მენეჯმენტის მიერ 2006 წლიდან დაიწყო და დღეს 74 ტიპის დასახელების 2000-ზე მეტი დასახელების ასორტიმენტს აწარმოებს. 2006-2007 წლებში ქარხანაში 3 მილიონი დოლარის ინვესტიცია განხორციელდა. 2007-2011 წლებში ქართული პროდუქციით რუსული და სხვა იმპორტული პროდუქციის ჩანაცვლება განხორციელდა: მოხდა საქართველოს ქალაქებისა და სოფლების გამრიცხველიანება, შეიცვალა გარეგანათების სისტემა საქართველოს მსხვილ ქალაქებში, განხორციელდა საქართველოს რკინიგზისთვის სასიცოცხლოდ აუცილებელი სპეციფიკური კაბელების წარმოება, განხორციელდა ექსპორტი სომხეთის რესპუბლიკაში. საწარმოში დასაქმებულია 200 თანამშრომელი, რომელთა საშუალო ხელფასი 600 ლარს აღემატება.