„საქსტატის" წინასწარი მონაცემებით, მთლიანი შიდა პროდუქტის დარგობრივ სტრუქტურაში ყველაზე დიდი წილით გამოირჩევა ვაჭრობა (18,9 პროცენტი), შემდგომ პოზიციებს იკავებს: მრეწველობა (16,9 პროცენტი), სახელმწიფო მმართველობა (13,5 პროცენტი), ტრანსპორტი და კავშირგაბმულობა (9,3 პროცენტი), მშენებლობა (8,2 პროცენტი), სოფლის მეურნეობა, მეთევზეობა (8,0 პროცენტი) და ჯანდაცვა (5,6 პროცენტი).

სტატისტიკის ეროვნული სამსახურის ინფორმაციით, გასული წლის წინასწარი მონაცემებით, 2011 წელს მნიშვნელოვანი ზრდა აღინიშნებოდა მშენებლობაში (23,2 პროცენტი), დამამუშავებელ მრეწველობაში (19,1 პროცენტი), საფინანსო საქმიანობაში (18,8 პროცენტი), ელექტროენერგიის, ბუნებრივი აირისა და წყლის წარმოებასა და განაწილებაში (14,4 პროცენტი), სხვა კომუნალური, სოციალური და პერსონალური მომსახურების გაწევაში (10,5 პროცენტი), ვაჭრობაში (6,9 პროცენტი), შინამეურნეობების მიერ პროდუქციის გადამუშავებაში (6,7 პროცენტი).

ზრდა დაფიქსირდა შემდეგ სექტორებში: კავშირგაბმულობა (6,4 პროცენტი), ოპერაციები უძრავი ქონებით, იჯარა და მომხმარებლისათვის მომსახურების გაწევა (4,8 პროცენტი), სახელმწიფო მმართველობა (3,9 პროცენტი), სოფლის მეურნეობა, ნადირობა და სატყეო მეურნეობა; თევზჭერა, მეთევზეობა (2,8 პროცენტი), განათლება (2,4 პროცენტი).
ხოლო კლება დაფიქსირდა სამთომომპოვებით მრეწველობაში (5,2 პროცენტი).
აღსანიშნავია, რომ 2011 წლის IV კვარტალში მშენებლობის სფეროში მთლიანი შიდა პროდუქტის რეალურმა ზრდამ გასული წლის შესაბამის პერიოდთან შედარებით 23,2 პროცენტი შეადგინა. ზრდის ტენდენცია განპირობებულია როგორც სახელმწიფო, ისე კერძო სექტორში მიმდინარე შენობა-ნაგებობების, სარკინიგზო და საავტომობილო გზების მშენებლობის მასშტაბური პროექტებით.

„საქსტატის" ინფორმაციით, დამამუშავებელ მრეწველობაში მაღალი ზრდის ტემპები წარმოადგენს კვების პროდუქტების, ღვინის, სამშენებლო მასალებისა და ქიმიური პროდუქტების წარმოების მნიშვნელოვანი განვითარების შედეგს.