„საქსტატის" ინფორმაციით, 2011 წლის წლიური მთლიანი შიდა პროდუქტის რეალურმა ზრდამ 2010 წლის მიმართ 7,0 პროცენტი შეადგინა, ხოლო დეფლატორის ზრდამ 9,2 პროცენტი. როგორც დღეს გამართულ ბრიფინგზე „საქსტატის" აღმასრულებელმა დირექტორმა ზაზა ჭელიძემ განაცხადა, 2011 წელს მთლიანი შიდა პროდუქტის მაჩვენებელმა მიმდინარე ფასებში 24 229,1 მლნ. ლარი შეადგინა, რაც 16,8 პროცენტით მეტია წინა წლის ანალოგიურ მაჩვენებელზე.
„აღსანიშნავია, რომ 2011 წელს მთლიანი შიდა პროდუქტი მუდმივ ფასებში 2004 წლის მიმართ 50,7 პროცენტით გაიზარდა. ამავე პერიოდში რეალური მშპ-ს საშუალო წლიურმა ზრდამ 6 პროცენტი შეადგინა"- აღნიშნა ზაზა ჭელიძემ.
„საქსტატის" აღმასრულებელი დირექტორი განმარტავს, რომ მთლიანი შიდა პროდუქტის დარგობრივ სტრუქტურაში ყველაზე დიდი წილით გამოირჩევა მრეწველობისა (17,3 პროცენტი) და ვაჭრობის (17,3 პროცენტი) დარგები, ხოლო შემდგომ პოზიციებს იკავებს სახელმწიფო მმართველობა (11,7 პროცენტი), ტრანსპორტი და კავშირგაბმულობა (10,6 პროცენტი), სოფლის მეურნეობა, მეთევზეობა (9,3 პროცენტი).
„საქსტატში" განმარტავენ, რომ 2011 წელს, წინასწარი მონაცემებით, მნიშვნელოვანი ზრდა დაფიქსირდა საფინანსო შუამავლობაში (24,3 პროცენტი), დამამუშავებელ მრეწველობაში (14,3 პროცენტი), ელექტროენერგიის, ბუნებრივი აირისა და წყლის წარმოებასა და განაწილებაში (8,9 პროცენტი), სასტუმროებსა და რესტორნებში (8,4
პროცენტი), კავშირგაბმულობაში (8,0 პროცენტი), ვაჭრობაში (7,4 პროცენტი), მშენებლობაში (7,3 პროცენტი).
სტატისტიკის ეროვნულ სამსახურში განმარტავენ, რომ ზრდა დაფიქსირდა შემდეგ დარგებში: სხვა კომუნალური, სოციალური და პერსონალური მომსახურების გაწევა (6,9 პროცენტი), ოპერაციები უძრავი ქონებით, იჯარა და მომხმარებლისათვის მომსახურების გაწევა (6,0 პროცენტი), სოფლის მეურნეობა, მეტყევეობა, თევზჭერა (5,5 პროცენტი), შინამეურნეობების მიერ პროდუქციის გადამუშავება (5,3 პროცენტი), ტრანსპორტი (5,1 პროცენტი).
აღსანიშნავია, რომ 2011 წელს კლება დაფიქსირდა სამთომოპოვებითი მრეწველობის დარგში (6,5 პროცენტი).
