ამერიკული კომპანია „დიუპონი"-ს წამყვანი სპეციალისტები კომპანია "კარტლისის" თანამშრომლებისა და ღვინის ქარხნების აგრონომებისთვის 20-21 მარტს, თელავში, კვალიფიკაციის ასამაღლებელ სემინარს ატარებენ.
„კარტლისი"-ს მენეჯმენტის ინფორმაციით, ამერიკული კომპანია „დიუპონი" მსოფლიოში ცნობილი ბრენდია, რომელიც საქართველოს ბაზარზე უკვე თორმეტი წელია მუშაობს და კვალიფიკაციის ასამაღლებელ ტრენინგებს საქართველოს წარმომადგენლობისთვის რეგულარულად ატარებს. ამჯერად „კარტლისის" თანამშრომლებთან ერთად სემინარს ღვინის ქარხნების აგრონომებიც შეუერთდნენ.
„დიუპონი რეგულარულად გზავნის ჩვენთან წამყვან სპეციალისტებს კვალიფიკაციის ასამაღლებელი სემინარების ჩასატარებლად, რათა ჩვენი თანამშრომლები, დისტრიბუტორები და მომხმარებელები დროულად ეცნობოდნენ სასოფლო-სამეურნეო კულტურების მოვლის თანამედროვე ტექნოლოგიებს. ღვინის ქარხნების აგრონომები, რომლებიც ამჯერად ტრენინგს ესწრებიან მიიღებენ ინფორმაციას ვაზის მოვლის თანამედროვე საშუალებების შესახებ. რაც მთავარია, პრეპარატების სწორი გამოყენების თემას კონფერენციისას ცალკე დრო ეთმობა, ვინაიდან მოსავლის მიღების წარმატების განმსაზღვრელი ფაქტორი სწორედ მათი სწორად და დროულად მოხმარებაა," - აცხადებს „კარტლისი"-ს ხელმძღვანელი რობერტ რევია.
კომპანია „კარტლისი" „დიუპონთან" 2000 წლიდან თანამშრომლობს და საქართველოში კომპანიის ოფიციალურ დისტრიბუტორს წარმოადგენს. „კარტლისი" დისტრიბუციას უწევს „დიუპონის" წარმოებულ ისეთ ცნობილ მცენარეთა დაცვის საშუალებებს, როგორებიცაა „კურზატი", „იტერალი", „კოსაიდი", „ტალენდო" და სხვა.
"დიუპონთან ხანგრძლივი და წარმატებული თანამშრომლობა გვაკავშირებს, რაც იმითაა განპირობებული, რომ ჩვენს კომპანიებს შორის მჭიდრო კონტაქტები არსებობს. ჩვენ მუდმივად გვსტუმრობენ დიუპონის წარმომადგენლები, რომლებიც აკვირდებიან ჩვენს მუშაობას და მონიტორინგს უწევენ გაწეულ სამუშაოებს. ეს კი მუდმივად გვაძლევს სტიმულს, რომ ჩვენი მომსახურება სულ უფრო და უფრო მაღალი ხარისხის იყოს,"- აცხადებს რობერტ რევია.
კომპანია „კარტლის"-ი (ყოფილი „გარემო და ანალიტიკა") 1997 წელს დაარსდა და მუშაობს სოფლის მეურნეობაში არსებული ყველა მიმართულებით: სათესლე მასალა, სასუქები, მცენარეთა დაცვის საშუალებები, საირიგაციო სისტემები, სასოფლო-სამეურნეო კულტურების წარმოება. ამ დროისთვის იგი თანამშრომლობს სოფლის მეურნეობის მიმართულების ისეთ მსოფლიო ბრენდებთან როგორებიცაა: DuPont, Pioneer, Bejo, TimacAgro და Stet Holland. კომპანიას გააჩნია ფერმერთა მომსახურების ცენტრები და სავაჭრო ობიექტები საქართველოს სხვადასხვა რეგიონში მათ შორის: ლაგოდეხში, ბოლნისში, წნორში, გორში, ზუგდიდში და სხვა რაიონულ ცენტრებში.
