აღნიშნული პროგრამის მთავარი მიზანია, სოფლის მეურნეობის დარგის განვითარების ხელშეწყობა, კერძოდ ფერმერებისთვის საბანკო პროდუქტებზე ხელმისაწვდომობის გაზრდა, რაშიც დაზღვევა უმნიშვნელოვანეს როლს ითამაშებს.

„საქართველოს ბანკს", „ალდაგი ბისიაისა" და აშშ-ს საერთაშორისო განვითარების სააგენტოს (USAID) ეკონომიკური აღმავლობის ინიციატივას (EPI) შორის გაფორმებული მემორანდუმის თანახმად, მხარეები განახორციელებენ სამწლიან საპილოტე პროგრამას, რომელიც ფერმერებს საშუალებას მისცემს უკეთ გაეცნონ აგროდაზღვევის სარგებლიანობას და გაუადვილებს მათ საკრედიტო რესურსზე წვდომას. აღნიშნული მიზნის მისაღწევად, საქართველოს ბანკი და USAID-ის ეკონომიკური აღმავლობის ინიციატივა (EPI), პროგრამის განხორციელების პირველ წელს ერთობლივად დააფინანსებენ სადაზღვევო პრემიის 90%-ს, დარჩენილ 10%-ს კი ფერმერი თავად დაფარავს.

„საქართველოს ბანკში" განმარტავენ, რომ ფერმერს სადაზღვეო პაკეტისთვის მინიმალური თანხის გადახდა მოუწევს.

„პროგრამის მიზანი, ჩვენს მომხმარებლებში, ფერმერებში აგროპროდუქტების ცნობადობის გაზრდა და იმავდროულად ჩვენი პროდუქტების ნდობის ამაღლებაა. რამდენიმე წელია რაც სადაზღვეო კომპანიებმა ფერმერებისათვის აგროპროდუქტების შეთავაზება დაიწყეს. დღეს აგროპროდუქტების ცნობადობა მომხმარებლებში არც თუ ისე მაღალია და კლიენტების უმეტესობა დაზღვევას თავს არიდებს და ხშირად ზარალსაც ნახულობენ. აღნიშნული პროდუქტის მიზანი კი, ამ ფაქტორების მოხსნაა. ასევე მნიშვნელოვანია ისიც, რომ მომხმარებლებს ვინც ჩვენი დაზღვევით ისარგებლებს, სადაზღვეო პაკატები 3-ჯერ ნაკლები დაუჯდება ვიდრე ეს ეღირებოდა სტანდარტულ შემთხვევაში. აღსანიშნავია, რომ ხარჯების ნაწილს დაფარავს აშშ-ს განვითარების სააგენტო, ნაწილს „საქართველოს ბანკი" და ფერმერს ძალიან მცირე ნაწილის გადახდა მოუწევს" - განაცხადა „საქართველოს ბანკის" მცირე და საშუალო ბიზნესის საბანკო მომსახურების დეპარტამენტის დირექტორმა ვაჟა მენაბდემ.

საწყის ეტაპზე დაგეგმილია მინიმუმ 300 ფერმერის დაზღვევა, რომლებიც საქმიანობენ EPI-ს მიერ შერჩეულ სექტორებში და მოჰყავთ სოფლის მეურნეობის ისეთი კულტურები, როგორიცაა: თხილი, მანდარინი, კარტოფილი, ხახვი, ნიორი სტაფილო და ჭარხალი. დაზღვევით სარგებლობა შეეძლებათ, როგორც საქართველოს ბანკის არსებულ მსესხებლებს, ასევე მათ ვინც დააპირებს აგროსესხით სარგებლობას. პროგრამა ითვალისწინებს 1,2 მილიონი აშშ დოლარის საკრედიტო რესურსის მობილიზებას სასოფლო-სამეურნეო სექტორში, რომელიც უზრუნველყოფილი იქნება აღნიშნული დაზღვევით. დაზღვევა იმოქმედებს ერთი აგროციკლის განმავლობაში და მოიცავს ბუნებრივი რისკებისგან დაზღვევის სრულ პაკეტს. ამავდროულად, პროექტის ფარგლებში ფერმერები ისარგებლებენ კონსულტაციებითა და ტრენინგებით, რაც მათ ზემოაღნიშნული კულტურების მოყვანის საუკეთესო პრაქტიკის დანერგვაში დაეხმარებათ.

„ალდაგი ბისიას" გენერალური დირექტორის მოადგილე გიორგი ბარაშათვილი აცხადებს, რომ ახალი პროდუქტები აგროწარმოებას განავითრება, რაც ქვეყნის ეკონომიკური განვითარების წინაპირობაა.

„დღევანდელი დღიდან ბაზარზე გამოვიტანეთ ახალი კულტურების დაზღვევა, როგორიცაა მანდარინი, კარტოფილი, ჭარხალი, სტაფილო, ნიორი და ხახვი. ეს არის ის კულტურები, რომელიც მოქცეულია EPI-ის ინიციატივის პროექტის ფარგლებში და რომლის მიზანიც ამ კულტურების განვითარებაა. აღნიშნული პროექტის მთავარი მიზანი კი საქართველოში სოფლის მეურნეობის დარგის კიდევ უფრო განვითარებაა, რაც პირველ რიგში ეკონომიკური განვითარების საწინდარია. აღნიშნული პროექტით, ჩვენ ხელს ვუწყობთ ფერმერებისათვის საკრედიტო რესურსზე ხელმისაწვდომობას. „საქართველოს ბანკი" ახდენს სადაზღვეო პოლისით რისკების მინიმალიზაციას. ამიერიდან ფერმერი უფრო მარტივად აიღებს სესხს და ბევრად მარტივად მოხდება სადაზღვეო პრემიის დაფარვა. აღსანიშნავია, რომ სადაზღვეო პრემიის 90 %-ს „საქართველოს ბანკი" ფარავს"- აცხადებს „ალდაგი ბისიას" გენერალური დირექტორის მოადგილე გიორგი ბარაშათვილი.

აღსანიშნავია, რომ სადაზღვევო კომპანია ალდაგი ბისიაი პირველი კომპანიაა, რომელმაც 2010 წელს აგროდაზღვევის პირველი პოლისი გასცა. კომპანია აქტიურად მუშაობს სოფლის მეურნეობის სხვადასხვა კულტურების დაზღვევაზე. ალდაგი ბისიაის სადაზღვევო პროდუქტი მრავალ ისეთ რისკს ფარავს, რომელიც შეიძლება ფერმერს სხვადასხვა გაუთვალისწინებელი შემთხვევის დროს დაუდგეს.