საპროექტო წინადადებები ეროვნულმა ჟიურიმ განიხილა და მათგან 5 საუკეთესო 5 მარტს გამოავლინა. შერჩეული კანდიდატები თავიანთ საპროექტო წინადადებაზე მუშაობას განაგრძობენ და 2012 წლის 28 სექტემბრამდე საბოლოო ანგარიშს წარადგენენ. ეროვნული ჟიური (თითოეულ მონაწილე ქვეყანაში) მათ შორის საუკეთესო სამეულს გამოავლენს, ამასთანავე კანდიდატების შეფასება საზოგადოებასაც შეეძლება. საიტზე www.quarrylifeaward.ge ამუშავდება ხმის მიცემის სისტემა, რაც გულშემატკივრებს საშუალებას მისცემს ნებისმიერი ქვეყნიდან 5-ბალიანი სისტემით შეაფასონ სასურველი პროექტი, გაიზიარონ სოციალურ ქსელებზე და ამით კონკურსანტს გამარჯვების მოპოვებაში დაეხმარონ.

პრესკონფერენციას დაესწრებიან კონკურსის ჟიურის წევრები - გარემოს დაცვის მინისტრი გოგა ხაჩიძე, ეკოლოგიის ინსტიტუტის დირექტორი პროფესორი დავით თარხნიშვილი, გერმანიის საერთაშორისო თანამშრომლობის საზოგადოების (GIZ) წარმომადგენელი გიორგი ლებანიძე, WWF კაუკასუსის წარმომადგენელი თამაზ გამყრელიძე და ჰაიდელბერგცემენტის გაყიდვებისა და მარკეტინგის დირექტორი აკაკი ჩხაიძე.

საქართველოში კონკურსში მონაწილეობის მსურველების რეგისტრაცია და კარიერებზე ბიომრავალფეროვნების ხელშეწყობასთან დაკავშირებით იდეის წარდგენა სპეციალურად ამ პროექტისთვის შექმნილ ვებგვერდზე - www.quarrylifeaward.ge იყო შესაძლებელი. ჩვენს ქვეყანაში კონკურსის პირველი ეტაპი წარმატებით დასრულდა: გვერდის უნიკალური მომხმარებლის რაოდენობამ 19, 304 შეადგინა, დარეგისტრირდა 215 მონაწილე და წარმოდგენილია 53 პროექტი. საერთაშორისო სტატისტიკის მიხედვით კონკურსში მონაწილე 18 ქვეყნიდან საზოგადოების ჩართულობის ყველაზე მაღალი მაჩვენებლი საქართველოში დაფიქსირდა.