საქართველოს ბაზარზე ოპერირებით უნგრული დაბალტარიფიანი ავიაკომპანია „Wizz Air"-ი და პოლონური "YES Airlines"-ი ინტერესდებიან.
„Wizz Air"-ისა და "YES Airlines"-ის ინტერესშია, რომ ფრენები ბათუმიდან განახორციელონ, აღნიშნულის შესახებ „ტავ ჯორჯიასათვის" ბერლინის ტურისტულ გამოფენაზე გახდა ცნობილი. „ტავ ჯორჯიას" ადმინისტრაციის მენეჯერის განმარტებით, კომპანიის მენეჯმენტი ბერლინში 5 დღის განმავლობაში არა ერთ ავიაკომპანიასა და ტურისტულ სააგენტოს შეხვდა.
„განსაკუთრებული ინტერესი ქართული ავიაბაზრის მიმართ უნგრულმა დაბალტარიფიანმა ავიაკომპანია „Wizz Air"-მა და პოლონურმა "YES Airlines"-მა გამოიჩინეს, რომლებიც სავარაუდოდ რეისებს ბათუმის მიმართულებით შეასრულებენ." - განაცხადა თეა ზაქარაძემ.
კომპანიის ინფორმაციით, 7-11 მარტის ჩათვლით, თბილისისა და ბათუმის საერთაშორისო აეროპორტების ოპერატორმა კომპანია „ტავ ჯორჯიამ" ყველაზე პრესტიჟულ სავაჭრო-ტურისტულ გამოფენაზე საკუთარ სტენდი წელს მესამედ წარმოადგინა.
„ITB Berlin ტურიზმის სფეროში ერთ-ერთი უმნიშვნელოვანესი მოვლენაა. წელს ბერლინში საქართველოს კუთხე განსაკუთრებული პოპულარობით სარგებლობდა. ყოველდღიურად ჩვენ სტენდთან შეკრებილ დამთვალიერებლებს თბილისის და ბათუმის საერთაშორისო აეროპორტების მიმართულებებისა და სერვისების შესახებ ამომწურავ ინფორმაციას ვაწვდიდით."- განაცხადა „ტავ ჯორჯიას" ადმინისტრაციის მენეჯერმა თეა ზაქარაძემ.
ბერლინში საკუთარი კუთხით იყო წარმოდგენილი „ტავ აეროპორტების ჰოლდინგი", რომელიც აქტიურად უჭერდა მხარს თავისი შვილობილი კომპანიის, „ტავ ჯორჯიას" საგამოფენო დახლის საერთაშორისო დონეზე წარმოჩენას.
აღსანიშნავია, რომ ITB Berlin მსოფლიოში ერთ ერთი წამყვანი გამოფენაა, სადაც ქვეყნის წარდგენა და მრავალრიცხოვანი აუდიტორიისათვის გაცნობა ხდება. გამოფენაში მონაწილე კომპანიები ერთმანეთს ტურიზმის სფეროში მიმდინარე ახალ ტენდენციებს უზიარებენ და ერთმანეთში სარფიან გარიგებებს დებენ.
შეგახსენებთ, რომ წელს ITB Berlin-ზე 187 ქვეყნის 10,644 კომანია იყო წარმოდგენილი, რომლებმაც მოგზაურობისა და ტურიზმის სფეროში არსებული ყველაზე საინტერესო და ხელსაყრელი პირობები, გამოფენაზე მისულ 113, 006-ზე მეტ დამთვალიერებელს გააცნეს.