"ქართული ოცნება" კონტროლის პალატას კონსტიტუციის უგულებელყოფაში ადანაშაულებს. პოლიტიკური კოალიცია "ქართული ოცნების" განცხადებაში აღნიშნულია,რომ საქართველოს კონტროლის პალატის მიერ პოლიტიკური კოალიცია "ქართული ოცნების" და მისი მხარდამჭერების წინააღმდეგ წამოწყებული კამპანია კონსტიტუციის უგულებელყოფით და ადამიანის უფლებების უხეში დარღვევებით მიმდინარეობს.
"11 მარტიდან დღემდე, კონტროლის პალატა, როგორც ცალკე, ისე პოლიციასა და სხვა აღმასრულებელ ორგანოებთან ერთად, უკანონოდ ახორციელებს „ქართული ოცნების" ასობით მხარდამჭერის შევიწროებისა და დაშინების ოპერაციას. რეალურად, მიმდინარეობს ბიძინა ივანიშვილის მხარდამჭერთა პოლიტიკური დევნა. 2012 წლის 15 მარტს კი, საქართველოს კონტროლის პალატამ ჩაიდინა მორიგი უკანონობა. ამ უწყების პარტიების ფინანსური მონიტორინგის სამსახურის უფროსის მოადგილემ ფიზიკური პირის ბიძინა ივანიშვილის წინააღმდეგ შეადგინა ადმინისტრაციული სამართალდარღვევის ოქმი „პოლიტიკური სუბიექტის უკანონო დაფინანსების" გამო", - ნათქვამია განცხადებაში და აღნიშნულია, რომ საქმე ეხება ბიძინა ივანიშვილის მიერ პირადი ადვოკატებისა და კონსულტანტებისათვის შრომითი ხელშეკრულებების საფუძველზე გადახდილ ანაზღაურებას.
განცხადებაში აღნიშულია, რომ აზანღაურების ასეთი ფორმა "მოქალაქეთა პოლიტიკური გაერთიანების შესახებ" საქართველოს ორგანული კანონის რეგულირების სფეროს არ წარმოადგენს და ბიძინა ივანიშვილსა და ამ პირებს შორის კერძო სამართლებრივი ურთიერთობის სფეროა.
"ამის მიუხედავად, ბიძინა ივანიშვილის წარმომადგენელი დაბარებულია საქართველოს კონტროლის პალატაში. უკანასკნელ პერიოდში, საქართველოს კონტროლის პალატის მიერ განხორციელებული უკანონო მოქმედებები პირდაპირ მიუთითებს, რომ ხელისუფლებას ჩაფიქრებული აქვს, გადაუკეტოს დაფინანსების ყველა საშუალება კრიტიკულად განწყობილ პოლიტიკურ და არაპოლიტიკურ სუბიექტებს, რათა მოუსპოს მოქალაქეებს პოლიტიკურ და საზოგადოებრივ პროცესებში მონაწილეობის ყოველგვარი სურვილი და შესაძლებლობა", - ნათქვამია განცხადებაში.
როგორც კოალიციაში აცხადებენ, ბიძინა ივანიშვილის პოლიტიკურ არენაზე გამოჩენიდან დღემდე, სახელმწიფო აპარატი ისეთი ახალი კანონებისა და პრაქტიკის დანერგვას ცდილობს, რომელიც პირდაპირ ბიძინა ივანიშვილისა და მისი მხარდამჭერების წინააღმდეგ არის მიმართული.
"არსებობს საფუძვლიანი ეჭვი, რომ ხელისუფლება ყველა ამ უსამართლობას საბოლოოდ ერთი დიდი უკანონობისთვის ნიადაგის მოსამზადებლად სჩადის. კერძოდ, ბიძინა ივანიშვილისთვის მოქალაქეობის მინიჭების საკითხის განხილვის ვადის ამოწურვამდე მხოლოდ 20 დღე დარჩა. ხელისუფლებას არ გააჩნია არავითარი კანონიერი საფუძველი, უარი უთხრას მას საქართველოს მოქალაქეობის მინიჭებაზე. ამიტომაც, ბიძინა ივანიშვილისთვის დიდი ოდენობით ადმინისტრაციული ჯარიმის დაკისრებით და სხვა, ე.წ. სამართალდარღვევების აღმოჩენის გზით, ხელისუფლება ცდილობს, ხელოვნურად შექმნას საფუძველი, რომ ბიძინა ივანიშვილი საფრთხეს წარმოადგენს სახელმწიფო და საზოგადოებრივი უსაფრთხოების ინტერესებისათვის და ამიტომ არ ანიჭებს მას საქართველოს მოქალაქეობას",- აღნიშნულია განცხადებაში.
პოლიტიკურ კოალიციაში აღნიშნავენ, რომ ხელისუფლების მცდელობების მიუხედავად, "ქართული ოცნება" დაწყებულ საქმეს ბოლომდე მიიყვანს და საპარლამენტო არჩევნებში გაიმარჯვებს.
