ავიაკომპანია „აირზენა" მზადაა ეკონომიკისა და მდგრადი განვითარების მინისტრს შეხვდეს და დარგში არსებულ პრობლემებზე დეტალური ინფორმაცია მიაწოდოს. როგორც სააგენტო „ჯი-ეიჩ-ენს" ავიაკომპანიის წარმომადგენელმა ნინო გიორგობიანმა განუცხადა. კომპანიის მენეჯმეტი მზადაა ვერა ქობალიას შეხვდეს.
„ავიაცია ზოგადად რთული დარგია. მინისტრი არ ფლობს სწორ ინფორმაციას დარგში არსებულ პრობლემებზე. ჩვენ მზად ვართ შევხვდეთ ვერა ქობალიას და დარგში არსებულ ვითარებაზე დეტალურად ვუამბოთ"- აღნიშნა ნინო გიორგობიანმა.
შეგახსენებთ, რომ დღეს ეკონომიკისა და მდგრადი განვითარების მინისტრის მიერ გაკეთდა განცხადება, რომ ავიაკომპანია „აირზენას" მენეჯმენტის პრობლემა აქვს. მისი თქმით,ხელისუფლება თავის დროზე „აირზენას" დახმარებას ცდილობდა.
მთავრობამ „აირზენას: შიდა რეისების შესრულება შესთავაზა, საწყის ეტაპზე საუბარი იყო მესტიის მიმართულებით ფრენების განხორციელებაზე. მისივე თქმით, იმ წინადადებაში, რომელიც მთავრობამ „აირზენას" შესთავაზა, სახელმწიფოს მხრიდან სუბსიდირება იგულისხმებოდა, თუმცა „აირზენამ" საბოლოოდ აღნიშნულ პროექტში ჩართვისგან თავი შეიკავა.
ქობალია აცხადებს, რომ „აირზენას"უფრო მენეჯმენტის პრობლემა აქვს და მინისტრმა მაგალითად მოიყვანა ებრაული კომპანიების განცხადება - თელავივის ავიაკომპანიები აცხადებენ, რომ მათ თბილისი-თელავივის მიმართულებით ფრენა უძნელდებათ, რადგანაც „აირზენას" საკმაოდ მაღალი ფასები აქვს.
