,,მონიტორინგი" „სოკარის" საწვავის ხარისხობრივი შემოწმების შედეგებს აქვეყნებს. ნავთობპროდუქტების სერტიფიკაციის ორგანო ,,მონიტორინგის" განცხადებით: "მიმდინარე წელს ნავთობპროდუქტების სერტიფიკაციის ორგანო ,,მონიტორინგი" აგრძელებს კომპანია ,,სოკარ ჯორჯია პეტროლეუმის" მიერ იმპორტირებული ბენზინისა (რეგულარი) და დიზელის (ლ-62) საწვავის ხარისხობრივ შემოწმებასა და სერტიფიცირებას. სინჯების აღება ხდება როგორც ვაგონ-ცისტერნებიდან, ასევე უშუალოდ ნავთობბაზებიდან და ავტოგასამართი სადგურიდან. შესაბამისად, იქმნება მთლიანი სურათი საწვავის ხარისხთან დაკავშირებით.
,,მონიტორინგის" ინფორმაციით, არ ყოფილა შემთხვევა, რომ ის მოქმედი სტანდარტის პირობებს ვერ აკმაყოფილებდა. უფრო მეტიშემოწმების შედეგების მიხედვით ორივე პროდუქტი შეესაბამება საქართველოში მოქმედ სტანდარტებს, შემოწმებული საწვავი საკმაოდ მაღალი ხარისხისაა, რაც ლაბორატორიული კვლევებით დასტურდება.
კერძოდ, ,,სოკარ ჯორჯია პეტროლეუმის" მიერ იმპორტირებული რეგულარის ტიპის ბენზინის შემოწმების შედეგად დადგინდა შემდეგი ფიზიკურ-ეკოლოგიური მახასიათებლები: ოქტანური რიცხვი რეალურად შეადგენს 92,5-93,0 ერთეულს (საქართველოს მოქმედი კანონმდებლობით უნდა იყოს არანაკლებ 91 ერთეულისა); ტყვიის შემცველობა მასში ფაქტიურად არ არის - 0,0010 - 0.0011 ერთეული (მოქმედი კანონმდებლობით - უნდა იყოს არა უმეტეს 0,005 ერთეულისა); არომატული ნაერთების მოცულობითი წილი შეადგენს 26,9 - 28,1 პროცენტს (საქართველოს მოქმედი კანონმდებლობით უნდა იყოს არა უმეტეს 42 პროცენტისა); ბენზოლის მოცულობითი წილი არის 0.85 - 0,92 პროცენტამდე (მოქმედი კანონმდებლობით უნდა იყოს არა უმეტეს 3 პროცენტისა); გოგირდის შემცველობა არის 98-115 ერთეული (მოქმედი კანონმდებლობით უნდა იყოს არა უმეტეს 250 ერთეულისა).
რაც შეეხება დიზელის საწვავის ლაბორატორიულ შედეგებს, ცეტანის რიცხვი შეადგენს 48,5-49,2 (მოქმედი კანონმდებლობით - არანაკლებ 47); გოგირდის მასური წილი - 168 - 295 (მოქმედი კანონმდებლობით - არა უმეტეს 300).
