2012 წელს ახალ პროდუქტებთან და საინტერესო აქციებთან ერთად ბანკი "რესპუბლიკა" შემდგომი გაფართოებისკენ გადადგმული ნაბიჯით იწყებს.
დღეს, 5 მარტს ბანკმა თბილისში, რკინიგზის სადგურის მიმდებარე ტერიტორიაზე ახალი, რიგით 38-ე სერვისცენტრი გახსნა. მოწვეულ სტუმრებს ბანკის გენერალურმა დირექტორმა კრისტიან კარმანიოლმა და კომერციულმა დირექტორმა რამაზ კუკულაძემ სიახლეები და შემდგომი გაფართოების სტრატეგია გააცნეს.
ბანკი "რესპუბლიკა", როგორც უნივერსალური ტიპის ფინანსური დაწესებულება, თანაბარ ძალისხმევას უთმობს როგორც საცალო, ისე მიკრო და მცირე ბიზნესის სრული სპექტრის საბანკო მომსახურებით უზრუნველყოფას. თამარ მეფის გამზირსა და "თბილისი ცენტრალის" მიმდებარე ტერიტორიაზე მოქმედ მიკრო და მცირე ბიზნესის წარმომადგენლებს ბანკ "რესპუბლიკის" მაღალი ხარისხის მომსახურებით სარგებლობა ამიერიდან სხვა უბანში გადაადგილების გარეშე შეეძლებათ. ახალი სერვისცენტრი კლიენტებს კვირაში 6 დღე მოემსახურება და სრულ საბანკო მომსახურებას გაუწევს.
"ჩვენს კლიენტებს, განსაკუთრებით მიკრო და მცირე ბიზნესის წარმომადგენლებს, სიამაყით წარმოვუდგენთ ახალ სერვისცენტრს, სადაც ისინი საკუთარი ბიზნესინტერესების გათვალისწინებით შექმნილი ინოვაციური საბანკო პროდუქტებით ისარგებლებენ და სწრაფ და კომფორტულ მომსახურებას მიიღებენ. სერვისცენტრისთვის ეს ადგილი სწორედ მათთვის მაქსიმალური კომფორტის შესაქმნელად შევარჩიეთ. ბანკი "რესპუბლიკა" წლის ბოლომდე კიდევ რამდენიმე ფილიალს გახსნის, რითაც კლიენტებს კიდევ უფრო დაუახლოვდება." - აცხადებს ბანკ "რესპუბლიკის" კომერციული დირექტორი რამაზ კუკულაძე.
შეგახსენებთ, რომ ბანკი "რესპუბლიკა" - 2006 წლიდან ჯგუფი "სოსიეტე ჟენერალის" წევრი საქართველოს ერთ-ერთი ყველაზე წარმატებული საფინანსო ინსტიტუტია. ბანკი 1991 წელს დაარსდა და ამჟამად საცალო და კორპორაციული მომსახურების ბაზარზე წამყვანი პოზიცია უკავია. თავისი 38 ფილიალის საშუალებით ბანკი კლიენტებს პროფესიონალიზმის, ინოვაციისა და გუნდური სულისკვეთების პრინციპების დაცვით ემსახურება.