გერმანიაში, ქალაქ დუსელდორფში ყოველწლიური ღვინისა და ალკოჰოლური სასმელების უმსხვილესი საერთაშორისო გამოფენა ,,Prowein 2012"-ი იმართება, რომელშიც მსოფლიოს სხვადასხვა ქვეყნების მწარმოებლებთან ერთად, ღვინისა და ალკოჰოლური სასმელების მწარმოებელი ქართული კომპანიებიც მონაწილეობენ. ქართულ დელეგაციას სოფლის მეურნეობის მინისტრი ზაზა გოროზია ხელმძღვანელობს.
საქართველო აღნიშნულ გამოფენაში ყოველწლიურად მონაწილეობს. წელს, ქართულ სტენდზე წარმოდგენილია ქართულ ღვინისა და ალკოჰოლური სასმელების მწარმოებელი კომპანიების ,,თბილღვინოს", ,,ჩელთის", ,,კორპორაცია ქინძმარაულის", ,,ბადაგონი 1882", ,,კორპორაცია ქართული ღვინის", ,,კახური ტრადიციული მეღვინეობის", ,,შუხმანის" და სხვა კომპანიების პროდუქცია. 4 მარტიდან ქართული პავილიონი ღვინის ექსპერტებს, ტრეიდერებს, დეგუსტატორებს, ჟურნალისტებს და უამრავ დამთვალიერებელს მასპინძლობს. 4-5 მარტს ქართული ღვინის დეგუსტაცია იმართება, რომელსაც ღვინის ჟურნალისტი და დეგუსტატორი ტომას ბრანდლი უხელმძღვანელებს.
გამოფენის ფარგლებში, სადეგუსტაციო კონკურსი გაიმართება, რომელშიც მონაწილეობას იღებენ ქართული კომპანიების ,,ჩელთის", ,,კორპორაცია ქინძმარაულის", ,,კახური ტრადიციული მეღვინეობის", ,,შუხმანის", ,,შატო მუხრანის", ,,თელიანი ველის", ,,ხარებას" პროდუქცია. გამარჯვებულს გამოფენის მიმდინარეობისას გამოავლენენ.
5 მარტს ქართული საღამო გაიმართება, რომელშიც ,,ქართული ხმები" მიიღებენ მონაწილეობას. მოწვეულ სტუმრებს ქართულ ღვინოსთან შეხამებით ქართული ტრადიციული ტკბილეულის და ყველის დაგემოვნების საშუალება ექნებათ.
,,Prowein"-ი მსოფლიოში ღვინისა და ალკოჰოლური სასმელების ერთერთი ყველაზე დიდი გამოფენაა, რომლის ვიზიტორთა რიცხვი ყოველწლიურად იზრდება. წელს, 45 ქვეყნიდან 3600 მონაწილესთან ერთად, 400 000-მდე სტუმარს ელოდებიან.
