"ქართული ოცნების" პრესსპიკერ მაია ფანჯიკიძის განცხადებით, ბიძინა ივანიშვილის ბაკურიანის რეზიდენციის დაცვის უფროსი, რევაზ მუმლაძე პოლიტიკური ნიშნით დააკავეს. როგორც ფანჯიკიძემ დღეს გამართულ ტრადიციულ ბრიფინგზე განაცხადა, ეს თამაზ თამაზაშვილის დაკავების შემდეგ მეორე პოლიტპატიმარია, რომელიც ბიძინა ივანიშვილს ან "ქართულ ოცნებას" უკავშირდება.
"ჩვენ ოფიციალურად შეგვიძლია გამოვაცხადოთ, რომ გვყავს მეორე პოლიტიკური პატიმარი. ეს არის ბაკურიანში, ბიძინა ივანიშვილის რეზიდენციის დაცვის უფროსი რევაზ მუმლაძე. მუმლაძე დააკავეს სრულიად უსამართლოთ. მას შეფარდებული აქვს წინასწარი პატიმრობა და ჩვენ მას განვიხილავთ როგორც პოლიტიკურ პატიმარს. პირველი პოლიტპატიმარი არის თამაზ თამაზაშვილი, რომელიც დააკავეს 11 ოქტომბერს, ბიძინა ივანიშვილის პირველი პოლიტიკური განცხადებიდან ერთი კვირის თავზე. თამაზ თამაზაშვილი არის ფონდ "ქართუს" დირექტორის, ირაკლი ღარიბაშვილის სიმამრი და ჩვენ მიგვაჩნია, რომ ესეც იყო პოლიტიკური ნიშნით დაკავება", - აღნიშნა ფანჯიკიძემ.
ფანჯიკიძის თქმით, ასევე პოლიტიკური ნიშნით დააკავეს "ქართული ოცნების" ახალგაზრდული ფრთხის 4 წარმომადგენელი, რომლებიც 25 თებერვალს, კიკვიძის ბაღში ხეების გაჩეხვასა და პოლიციის მშენებლობას აპროტესტებდნენ. ფანჯიკის განცხადებით, "ქართული ოცნება" გააპროტესტებს იმ 400-ლარიან ჯარიმას, რომელიც ახალგაზრდებს გათავისუფლების სანაცვლოდ დაუწესეს.
"ახალგაზრდებს კანონის არცერთი მოთხოვნა არ დაურღვევიათ, რადგან ისინი მშვიდობიან მანიფესტაციას მართავდნენ. მათი უდანაშაულობა კადრებშიც არის ასახული", - განაცხადა ფანჯიკიძემ.
