ტურისტულ ზონებში "ტურისტული საწარმო" შეიქმნება. მთავრობის საპარლამენტო მდივნის, გია ხუროშვილის განმარტებით, "საგადასახადო კოდექსში" შესატანი ცვლილების მიხედვით, ტურისტულ ზონებში "ტურისტული საწარმო" შეიქმნება, რომელიც დაკავებული იქნება სამშენებლო საქმიანობით. ნებისმიერ მოქალაქეს საშუალება ექნება, შეიძინოს ბინა, რომელსაც 8 წლის ვადით გააქირავებს და გარანტირებულ შემოსავალს მიიღებს.
"გარდა ამისა, ამ ტიპის ხელშეკრულების გაფორმების შემთხვევაში, მოქალაქეს უკან დაუბრუნდება გადახდილი დღგ, ანუ თანხის 18%. ასევე, ხელშეკრულებაში შეიძლება გათვალისწინებული იყოს, რომ წელიწადში ერთი თვის განმავლობაში ბინის მესაკუთრეს უფლება აქვს, ბინა გამოიყენოს პირადი მოხმარების მიზნით", - აცხადებს ხუროშვილი.
ხუროშვილის განმარტებით, ახალი ინიციატივის მიზანია, ხელი შეეწყოს უძრავი ქონების ბიზნესის განვითარებას, რათა ადამიანებმა ფული აქტიურ ბიზნესში დააბანდონ და შემოსავალი მიიღონ.
"ასევე, გაჩნდეს ახალი სასტუმროები, რომელიც ხარისხიან და ხელმისაწვდომ სერვისს შესთავაზებს ტურისტებს", - აღნიშნა ხუროშვილმა.