სოფლის მეურნეობის დარგში ყველაზე დიდი პოტენციალი მეორად წარმოებაშია, - ამის შესახებ სააგენტო "ჯი-ეიჩ-ენთან" საუბრისას ეროვნული საინვესტიციო სააგენტოს ხელმძრვანელმა ქეთი ბოჭორიშვილმა განაცხადა. ბოჭორიშვილის თქმით, სააგენტომ რამდენიმე სექტორის კვლევა უკვე განახორციელა, მათ შორის სრულად გამოკვლეულის სოფლის მეურნეობის დარგიც.
"სოფლის მეურნეობაში არის საკმაოდ დიდი პოტენციალი. ყველაზე დიდი პოტენციალია არა პირველად წარმოებაში, არამედ მეორედ წარმოებაში, რაშიც იგულისხმება ის, რომ მოხდეს გადამუშავება პირველადი წარმოებისა და განხორციელდეს წარმოების ჯაჭვის შეკვრა. ჩვენთვის მნიშვნელოვანია, რომ სოფლის მეურნეობის დარგში რაც შეიძლება მეტი საწარმო გაიხსნას"- განაცხადა "ჯი-ეიჩ-ენთან" საუბარში ქეთი ბოჭორიშვილმა.
მისივე ინფორმაციით, 2012 წლისთვის დაგეგმილია 25 საინვესტიციო პროექტის შექმნა, რომელიც ინვესტორებს წარედგინებათ. ამ პროექტებიდან კი რამდენიმე სოფლის მეურნეობის სექტორის განვითარებაზე იქნება ორიენტირებული.